2026-mut missingersuutit pillugit allaaserisat nangeqattaartut sisamaat
Kommuneqarfik Sermersuumi innuttaasut utoqqaanerusut siunissami malunaatilimmik amerleriassapput. Tamanna sulisut kivissinnaasaannut, pitsaassutsimut aamma utoqqarnik paaqqutarinninnissamut piumasaqaateqarfiuvoq. Taama ineriartorneq akisussaassuseqartumik eqqarsarluarlunilu iliuuseqarfigineqassasoq kommunalbestyrelsep kissaatigaa, utoqqaanerusullu tamarmik toqqissisimanartumik ataqqineqarlutillu utoqqalissasut, isumassorneqarlutik inuunerminni isumaqartitaminnik sammisassanik periarfissaqarlutik.
Utoqqaat ilaat utoqqaat angerlarsimaffiini ullumi najugaqarput, naak utoqqaat angerlarsimaffianni atugassarititaasartunit allaanerusunik pisariaqartitsigaluarlutik. Pingaartumik tarnikkut imaluunniit inooqatigiinnikkut piginnaanikillisimasut ulluinnarni immikkut tapersersorneqarnissamik aamma allaanerusumik aaqqissuussamik pisariaqartitsisut pineqarput. Taamaammat taakkununnga immikkut immikkoortortamik sanaartortoqassaaq. Utoqqaanerusut pineqartut pisariaqartitaat tunngavigalugit pilersinneqartussami taakku inuunerissaarerusinnaanissaannut, namminiusinnaanissannut eqqortumillu tapersersorneqarnissaannut periarfissinniarneqarput. Utoqqarnik paaqqutarinninnermi sullissinissaannarmik eqqarsarani pinissamik anguniagaqarnermut pingaaruteqarpoq, inuilli ataasiakkaat inuuneriissaartinnissaannik anguniagaqarfiulluni.
Siunissaq ungasinnerusoq eqqarsaatiginerullugu pilersaarusiorsinnaajumalluni utoqqarnut suliniutit annertunerusut tamarmik utoqqarnut aningaasaliissutitut ataatsimoortinneqassapput. Utoqqarnut aningaasaliiffigisassatut pineqarput Nuummi puigortunngortut angerlarsimaffissaat, Tasiilami utoqqaat angerlarsimaffiat aamma Ittoqqortoormiini utoqqaat najugaqatigiiffiat. Suliniutinik ataatsimoortitsinikkut kommuni tamakkiinerusumik aamma pisariaqartitat najukkamilu pissutsit aallaavigalugit suliniuteqarsinnaassaaq. Aningaasaliissutinik ataatsimoortitsineq eqaannerulersitsissaaq, pisariaqartitsinerullu annerpaaffia naapertorlugu aningaasaliissutit atorneqarsinnaassapput. Tamanna isumaqassaaq kommunimi tamani utoqqaanerusut – Nuummi illoqarfinnilu minnerusuni aamma nunaqarfinni – siunissami assigiiaarnerusumik aalaakaanerusumillu atugassaqartinneqarnerannik.
Taassuma saniatigut utoqqarnut politikki nutaaq suliarineqassaaq, ukiuni aggersuni utoqqarnut suliassaqarfimmi siunnerfimmik inissiisussaq. Utoqqarnut politikkip illoqarfinni assigiinngitsuni nunaqarfinnilu innuttaasut pisariaqartitaannik, innuttaasut katitigaanerisa allanngoriartornerannik aamma najukkami pissutinik aallaaveqarnissaq qulakkiissavaa. Utoqqarnik paaqqutarinninnermi assigiinngissutsit annertuut annikitsullu ulluinnarni eqqarsarsaatigineqarnissaat qulakkeerneqassaaq. Taamaammat isumaginninnermi suliassaqarfimmi suliat tamarmik ingerlanerannik misissuisoqassaaq. Utaqqisitsisarnerit ingerlatsinerillu katitigaasut ikilisinneqarnissaat aamma sullissinerit innuttaasunut sulisunullu paasiuminarnerunissaat anguniagaavoq. Sullissineq pitsaanerulerlunilu erseqqinerulerpat innuttaasunut utoqqaanerusunut qanigisaasunullu oqinnerulissaaq, aporfeqartinneqaranilu imaluunniit sivisuumik utaqqisinneqaqqaarani pisariaqartitamik ikiorneqarnissaq pisinnanngussaaq.
Utoqqaattaaq sammisassaqartinneqarnissamut ataatsimoornissamullu periarfissagissaartinneqarnerulernissaat ukkatarineqassaaq. Utoqqaat amerlanerusut najugaqarfigisaannut ungasinngitsuni amerlanerusunik isumalinnik neqerooruteqarfigisinnaaniarlugit, Nuummi Utoqqaat Illuanni sammisassaqartitsivimmi inissat amerlineqassapput. Illumi sanaartukkatigut atortussat pisariaqartut pigineqareermata suliniarnermi sulisoqarnerulersitsinissaq aamma atortussanik naapertuuttunik ulluinnarni imaqarlualersitsisussanik pissarsinissaq suliniutaanerussapput. Nuummi utoqqaat amerlanerusut ataatsimoornernut kiserliorunnaarsitsisunut, timikkut tarnikkullu uummarissaataasunut peqataasinnaanissaat anguniagaavoq, aamma qanorluunniit ukioqaraluarunik inuiaqatigiinni peqataaginnarsinnaanissaannut periarfissiinissaq.
Utoqqarnut tunngasunut suliniuteqarnermi qanilaarnissaq aamma siunissaq eqqarsaatigalugu pilersaarusiornissaq, 2026-mut missingersuutinut isumaqatigiissutimmi takutinneqarpoq. Suliniutinik nutaanik, sinaakkutinik pitsaanerusunik, politikkikkut suliniutinik ataqatigiinnerusunik aamma ulluinnarni neqeroorutinik amerlanerulersitsinikkut utoqqaat tamarmik – tunuliaquttat, najugaq aamma qanoq pisariaqartitsineq apeqqutaatinnagit – toqqissillutik, ataqqineqarlutik isumalimmillu inuunissaat kommunip kissaatigaa. Utoqqaat paaqqutarineqaannaratik, kisiannili inuiaqatigiinni ataqqineqarlutik inuttut pisariaqartitaat eqqarsaatigalugit pisinnaatitaaffeqarlutillu sullinneqanissaannut aningaasaliineruvoq.