2026-mut missingersutit pillugit allaaserisat nangeqattaartut aappaat
Ilaqutariinnut politikki aallartinneqareersoq, kommunalbestyrelsep ineriartorteqqinniarpaa: meeqqat ilaqutariillu siusinnerusukkut aamma ataqatigiinnerusumik tapersersorneqartassapput. Misilittakkat takutippaat ajornartorsiutit ingasappallaaleraangata aatsaat ilaqutariippassuit ikiorneqartartut, taamaammat pinaveersaartitsilluni suliniutit maanna annertusineqaqqipput. Suliat ingerlareersut nukittorsarnissaat aamma suliniutit meeqqanut ilaqutariinnullu iluaqutaalereersut annertusaqqinneqarnissaat, 2026-mut missingersuutinut isumaqatigissummi siunertarineqarpoq.
Taama allannguineq anguniarlugu pinaveersaartitsilluni suliniutinut ukiumut 7-8 millionit koruunit immikkoortinneqartassapput. Meeqqat amerlanerusut angerlarsimaffimminniiginnarsinnaanissaat aamma pisut ilungersunarsinngineranni ilaqutariit tapersersorneqarnissaat anguniagaavoq. Iliuuseqajaarnermi meeqqat ikiorneqarnissamik pisariaqartitsisut aalaakkaanerusumik toqqissisimanartumillu inuunissaannut kommuni periarfisseerusuppoq, angajoqqaallu inuunerminni unammillernartunik aaqqiisinnaanissaat nukittorsarniarneqarluni.
Suliniutinik annertusaanermi inuusuttut atornerluinermik ajornartorsiuteqartut aamma pineqarput. Inuusuttut suli tapersersorneqarnissaminnik pisariaqartitsigaluarlutik ullumi 18-inik ukioqaleraangamik tapersersorneqarnerat unittarpoq. Inuusuttut atornerluisut siunissami 23-nik ukioqalernissartik tikillugu malinnaaffigineqarsinnaanissaat periarfissaalissaaq. Tamanna isumaqarpoq inersimasunngoriartornermi ilinniagaqalernissamut, suliffittaarnissamut nammineersinnaalernissamullu ikaarsaarnermi amerlasuutigut ilungersunarsinnaasumi tapersersorneqarsinnaanermik. Sivisunerusumik tapersersuisalernermi angerlarsimaffeeruttarnerit, pinerluttuliortarnerit aamma atornerluisunngoqqittarnerit pinaveersaartinneqarsinnaassasut kommunip neriuutigaa – inuusuttullu inersimasunngornerminni aallartilluarnissaannut periarfissikkusunneqarput.
Suliniutit kommunimi tamani erseqqissuussapput. Nuummi ilaqutariit ikiorneqarnissartik utaqqiluusaannginniassammassuk aamma suliassat piffissap ingerlanerani aalaakkaanerusumik ingerlassinnaajumallugit sulisunik amerlanerusunik atorfinititsisoqassaaq. Ilaqutariinnittaaq siunersioqatigiissitsisarneq sulinermi atulersinneqassaaq. Tamanna isumaqarpoq aaqqiissutissarsiornermi meeqqap ilaqutaasa attaveqaatigisartagaasalu aaqqiissutissarsioqataasussatut qaaqquneqartarnissaannik. Meeqqap nammineq atassuteqarfigisartagai siusissukkut peqataatinneqaraangata, meeqqat angerlarsimaffiup avataanut inissinneqartarnerat kommunip pinaveersaartinnerusinnaavaa.
Suliniutittaaq Nuup avataani annertusineqassapput. Paamiuni angajoqqaarsiat siullermeertumik namminneq siunnersorteqalissapput. Taamaaliornikkut angajoqqaarsiat qaninnerusumik tapersersorneqarsinnaalerlutillu ataavarnerusumik avitseqateqarsinnaanngussapput, meeqqallu paarsatik aalajaatsumik peroriartortissinnaassallugit. Angerlarsimaffinnut allanut akulikitsumik inisseeqqittarnerit meeqqap atugarissaarneranut toqqissisimaneranullu sunniuteqarsinnaasut, siunnersortip pinaveersaartitseqataaffigissavai.
Tasiilami Meeqqat Illuanni Pigeermi meeqqanik persuttagaasimasunik imaluunniit kinguaassiutitigut atornerlugaasimasunik sullissivimmi sulineq pitsanngorsarneqassaaq. Suliniummik annertusaaneq meeqqat, angajoqqaat angajoqqaarsiallu sukkanerusumik ataqatigiinnerusumillu sullinneqarnerannik malitseqassaaq aamma politiit, peqqinnissaqarfiup kommunillu akornanni suleqatigiinneq qaninnerulissalluni. Meeqqat pisunik ajornerpaanik nalaataqartut suliamut ilisimasaqarluartunit sullinneqarnissaat aamma misigisatik sakkortuut pissutigalugit kingunerlutinit aniguiniarneranni imminiiginnarneqannginnissaat qulakkeerneqassaaq.
Taakkunani suliniutaasuni tamani anguniagaq erseqqippoq: meeqqat ilaqutariillu siusissukkut ikiorneqartassapput aamma Kommuneqarfik Sermersuumi meeqqat tamarmik – sumiluunniit najugaqartut – toqqissillutik aalajaatsumillu peroriartornissaminnut periarfissaqassapput. Taamaammat 2026-mut missingersuutinut isumaqatigiissut aningaasanik pingaarnersiuinerinnarmut tunnganngilaq, suleriutsimilli allannguinermik inummullu isiginninnermik allanngortitsinermik tunngaveqarluni. Pinaveersaartitsinermut, qanilaarnermut isumassuinermullu aningaasaliineruvoq aamma ajornartorsiutit annertuallaalinnginneranni meeqqat tapersersorneqartarnerisa pitsaanerpaasaranik upperinninnermut.