2026-mut missingersutit pillugit allaaserisani nangeqattaartuni siulleq
2026-mut missingersuutinut isumaqatigiissut kommunalbestyrelsep akuersissutigeqqammerpaa. Isumaqatigiissut kommunimi tamani malugineqassaaq – aamma Nuummut ungasinneq pissutigalugu kiffartuussinermut unammillernartoqartitsiffiusinnaasartumi. Missingersuutinut isumaqatigiissut illoqarfiit pingaarnersaata avataaniittunut innuttaasunik kiffartuussinermut qanoq iluaqutaassanera uani allaaserisami siullermi oqaluttuarissavarput.
Ittoqqortoormiini nutaamik aqutsisoqarneq
Ittoqqortoormiini illoqarfimmi pisortaqalernikkut aamma ingerlatsinermi aqutsisoqalernikkut illoqarfimmi aqutsisunik siullermeerluni pilersitsisoqassaaq. Alloriarnerujussuuvoq, pissutigalugu siunissami aalajangiussassat innuttaasunut qaninnerusumik aalajangiiffigineqartalissammata, najukkamilu pisariaqartitat siornatigumut sanilliullugu toqqaannarnerusumik suliarineqarsinnaanngussapput.
Ulluinnarni aqutsineq qaninnerulerpat innuttaasut apeqqutaat kommunimit piaarnerusumik akineqarsinnaanngussapput. Ineriartorneq malinnaaffigilluarneqassaaq, sulinerullu aaqqissuussaanera pitsaanerulersinniarlugu misilittagaalersut ukiup affakkaartumik nalilersorneqartassapput.
Nunaqarfimmi aqutsisuttaaq aningaasanik atorsinnaasaminnik ingerlatsiinnarsinnaassapput, sulinerallu isumasioqatigiinnernut peqataatitsisarnikkut tapersersorneqassaaq, taamaaliornikkut akisussaaffii piginnaasaallu nukittorsarneqartassalluutik. Najukkami inuiaqatigiit illoqarfimminnut nunaqarfimminnulluunnit tulluartunik namminneq salliutikkusutaminnik aaqqiissutissanillu ineriartortitsinermik ingerlatsiinnarsinnaanissaat anguniagaavoq.
Tasiilami nunaqarfiinilu innuttaasunik kiffartuussineq pitsaanerusoq
Missingersuutinut isumaqatigiissummittaaq Tasiilap nunaqarfii annerit pingasut pingaarutilimmik suliniuteqarfigineqassapput, tassani innuttaasunik kiffartuussineq pitsaanerulersinniarlugu ukiuni marlunni misiligutaasussamik suliniummik aallartitsisoqassammat. Nujagarisami suliassarpassuit pisariusut sulisut ullumi kisimiillutik akisussaaffigalugillu aalajangiiffigisarpaat.
Sulianik ilungersunartoqartillugu avitseqateqarnissaq pisariaqartinneqartartoq, suleqatigisanut Nuummullu ungasinneq pissutigalugit ajornakusoorsinnaasarpoq. Sulisut aaqqiiniarnerminni periarfissagissaarnerunissaat misiligutaasumik suliniummi anguniarneqarpoq, innuttaasullu sullinneqarnertik pitsaanerusoq toqqissisimanarnerusorlu misigissavaat.
Suliassat amerlanerusut najugarisami piffissap ingerlanerani tamakkiisumik aaqqineqartalernissaat ilimagineqarpoq, taamaalilluni ulluinnaat innuttaasunut ikiorneqarusuttunut aamma sulisunut ikiuisussanut oqinneruniassammata.
Innuttaasut peqataatillugit illoqarfiit pillugit periusissianik ineriartortitsineq
Nuup avataanittaaq ineriartortitsinermut tunngatillugu siunissaq ungasinnerusoq eqqarsaatigalugu aalajangiussat pineqarput. Taamaammat kommunimi illoqarfiit arlallit nutaamik maanna periusissiorfigineqarput. Paamiuni Tasiilamilu innuttaasunik ataatsimiisitsisoqareerpoq, illoqarfinnilu najugallit misilittakkaminnik, isumassarsiaminnik aamma pingaarnersiunissamut siunnersuutinik anngussaqarput.
Periusissiat 2026-mi ukiup affaani siullermi piareersimassapput. Naammassisimaleriarpatalu suliniutit qanoq aaqqissuunneqassanersut, suullu aaqqiissutissat najukkami inuiaqatigiinnut tulluarnerpaanersut kommunalbestyrelsemi oqallisigineqassapput. Taama suleriuseqarnerup immikkuullarissutigaa pilersaarutit qulaaniit ineriartortinneqassanngimmata, innuttaasulli peqatigalugit sulinerussalluni – pissutigalugu sumiiffinni najugaqartut ilisimasaat tunniusimanerallu aalajangiussanut pitsaanerulersitsisarlunilu ataavartitsinerusarmat.
Ataatsimoorluni anguniagaq: Qaninerusumik kiffartuussineq inuiaqatigiillu nukittunerusut
Taakkunani suliniutini erseqqissumik kissaataavoq: Kommuneqarfik Sermersuumi innuttaasut kommunimit tusarnaarneqarlutik, qisuariarfigineqartarlutik aamma ikiorneqartarlutik misigisarnissaat – sumiluunniit najugaqaraluaraanni.
2026-mut missingersuutinut isumaqatigiissummi anguniagaavoq najugarisami aqutsisinnaanerulernissaq, najukkami iliuuseqarsinnaanerulernissaq aamma aalajangiussassat utaqqiluusaanngikkaluarlugit innuttaasunik kiffartuussineq pitsaanerusoq.
Sulisut sulinerminni atugarissaarnerulerpata aamma innuttaasut pitsaanerusumik kiffartuunneqarsinnaalissapput. Innuttaasullu ineriartornermut peqataatinneqaraangata aaqqiissutit tulluarnerulerlutillu qajannaannerulissapput.
Naatsumik oqaatigalugu una missingersuutinut isumaqatigiissut kommunip sumiiffinni tamani qanilaarnissaanik anguniagaqarfiuvoq. Innuttaasutut kommunimit ikiorneqarsinnaanermik misiginissaq qulakkeerniarneqarpoq – Nuummi, Paamiuni, Tasiilami, Ittoqqortoormiini aamma inoqarfinni minnerusuni nunaqarfinnilu.
Kommuneqarfik Sermersuumi oqartussaaqataaneq, kiffartuussineq aamma nukittuumik ataqatigiinneq pillugit siunissaq ungasinnerusoq eqqarsaatigalugu aningaasaliineruvoq.