Kommuneqarfik Sermersooq nunat tamalaat akornanni inuit innarluutillit ulluannik malunnartitsilluni katersortarfimmi decembarip ulluisa pingajuanni tamanut ammasumik qaaqqusivoq – matullu suli ammarneqanngitsulluunniit soqutiginnittoqarluarpoq. Ataatsimoorneq, saammisassaqartitsineq aamma peqataatitsineq aaqqissuussami qitiutinneqarput, innuttaasullu 170-it missaanniittut peqataaffigaat.
Peqataasut ilagaat Peqqissutsimut inunnullu Innarluutilinnut Naalakkersuisoq, Anna Wangenheim, aamma peqqissaasut pisortaat, Inuuti Fleischer. Taakku peqataanerisigut innarluutillit pillugit qanimut suleqatigissutigineqarnissaata pingaassusaa naqissuserneqarpoq.
Ullup ingerlanerani sammisassarpassuit peqataasunit soqutigineqarluartut ilaatigut tassaapput karsi maluginiagassanik imalik, juullerpaluttuliorneq, nigalinnik nalussineq, juullisunnitsunik mamakujuliorneq, assilisinneq aamma kalaaliminernik ooqattaarineq.
Aaqqissuussaq uku aningaasaliinerisigut piviusunngorsinnaanngorpoq:
- Pisiffik, 2.000 kr.-nit nalinginut tunnissuteqarpoq, koorit sisamat 500 kr.-nit nalinganut imallit.
- Brugseni, koorit marluk 400 kr.-nit nalinginut imallit tunnissutigaat.
- Kontorforsyning, kuponloddinik arfinillit tunnissuteqarpoq.
- Lions Club, kalaaliminernik 2.000 kr.-nit nalinginut tapiivoq.
- Fixpain, pisissutissanik pingasunik 500 kr.-nit nalinginut tunissuteqarput.
Eqqugassat nal. 13.30-p kingorna makitsissutigineqarput, peqataasullu nuannaarutigisaannik Nahome aamma Nukannguaq juullerpalaartunik ualip ingerlanerani appisimaarput.
Ullumi ulloq decembarip qulingat aamma tassaavoq Inuit pisinnaatitaaffii pillugit ullorititaq – tamanna innarluutillit pisinnaatitaaffiisa aamma inuttut pisinnaatitaaffiunerannik eqqaasitsivoq. Inuit tamarmik peqataanissaminnut periarfissinneqarnissaat, tusaaneqarnissaat aamma ataatsimoornernut peqataasinnaanissaat malunnartitsinermi naqissuserneqarpoq. Kommuneqarfik Sermersuumi taama anguniagaqarnerput nangillugu sulissaagut.
Assini takuneqarsinnaapput ullup ingerlanerani nuannisaqatigiinneq, peqataasorpassuit aamma nunat tamalaat akornanni inuit innarluutillit ulluannik kommunimi malunnartitsineq.
