Kommuneqarfik Sermersuumit pingasunngorneq 03.12.2025-miit Nuup Qinnguttalu akornanni sullorsuarmi angallanneq iluarsineqassaaq, angallannernik kisitsinerit tunngavigalugit ajornannginnerusumik isumannaannerusumillu angallannissaq pilersinniarlugu.
Siunertarineqartoq tassaavoq, sullorsuup matoqqasarnera sivikinnerulersinnissaa (naanerini illuttut aappaluttuusarnera) taamaaliornikkullu biilertunut utaqqisarneq sivikinnerulernissaa. Tamanna isumaqarpoq, sullorsuarmi minnerpaamik sukkassusissaq annertunerulersinneqassasoq – pingaaruteqarporlu angallattut tamarmik aappaluttuuneranut ataqqinnittarnissaat tamanna isumannaallisaanermut pingaaruteqarluinnarmat. Aappaluttuunera malinneqanngippat biilit illuanut ingerlasut takkussinnaapput.
Angallannerpaaffimmi ataasiinnarmik sammivilimmik angallanneq – piffissami misiligutaasumi
Piffissami pingasunngorneq 03.12.2025-miit 04.02.2025-mut qaammatini pingasuni misiligutaasumik angallannerpaaffimmi sullorsuaq ataasiinnarmik sammivilimmik angallaffiussaaq:
- Qinngutsinniit Nuummut: nal. 07:30–08:30
- Nuummiit Qinngutsinnut: nal. 15:30–16:30
Allannguineq aamma isumaqarpoq, 03.12.2025-miit Sipisap kaajallattariaani qulleq aappalaartoq 07:30-08:30 ikumasartussatut iluarsineqassasoq, 06:30-08:30 ikumasarunnaarluni.
Ualikkut sivikinnerusumik ataasiinnarmik sammivilimmik ingerlaarsinnaaneq isumaqassaaq, Qinngutsinniit Nuummut biilertut sullorsuakkoorsinnaanissamut periarfissaqarluarnerulissasut taamaalilluni Qinngutsinniit Eqalugalinnguit tungaannut tunuleriiaanneq annikillilluni.
Qulliup iluarsineqarneranut ilassutitut kisitsissut ikkunneqassaaq – taanna ataasiinnarmik sammiveqarnerup avataatigut – qulliup aappalaartumiit qorsunngornissaanut sekundit qassiinnanngornerinik takutitsisuussaaq.
Isumannaatsumik angallannermut akisussaaqatigiinneq
Angallattut tamaasa eqqarsaatiginninnissaannik aamma qullernik nutaanik malinninnissaannik kajumissaarpagut. Iluarsiinermi angallannerup – sullorsuarmi eqqaanilu – angallannerup tamanut pitsaanerulersinnissaa siunertaavoq.
Misiliiffiusumi paasinninnissinnut suleqataanissinnullu qujanaq.