Maanna Kommuneqarfik Sermersuumi Nuup ilisarnaatissaanik nutaamik unammisitsinermi toqqarneqartoq tamanut nalunaarutigineqarpoq – suliniut, toqqaannartumik inuttaasut namminneq kissaatigisaannit aammalu illoqarfiit pingaarnersaannut periusissiamut Nuuk2035-mut atatillugu annertuumik innuttaasunik peqataatitsinermit aallaaveqartoq.
Innuttaasut 1.000-it sinneqartut peqataapput workshoppertoqarnerani, apeqqutinik akisassanik immersuisitsinermi aammalu sammisaq pillugu attuumassuteqartunik apersuinikkut, tassani kissaatigineqarluni kulturikkut ataatsimoorfeqarneq oqariartuutigineqartut ersarinnersaralugu. Periuserineqartumi aalajangersarneqarpoq ”oqaaseqareerput – tamannalu pisussaaffiliivoq”, taamaattumillu unammisitsineq una aallartinneqarpoq nukittuumik takussutissartalimmik, sumiiffiit sakkortuumik ilisarnarluartut aammalu Nuummi kulturikkut katersuuffissat amerlanerit pillugit kissaateqarnermut toqqaannartumik malinnaatitsinertut.
Suliniut pilersinneqarpoq illoqarfik nukittuumik ilisarnaateqartillugu katersuuffiusinnaanngorlugu, Nuummi kulturimik, oqaluttuarisaanermik aammalu siunissami ineriartornissamut ersersitsisumik.
Unammisitsinermi ajugaasoq
Siunnersuutinik nassiunneqartunik sukumiisumik nalilersuereernerup kingornagut nalilersuisartutut komité amerlanernit taaneqartunit piukkunneqartunik marlunnik innuttaasunut tamanut ammasumik taasititsivoq. Tassani innuttaasut peqataasut amerlanerit Arkitekt, Cand arch. Bilo Høegh Stigsenip siunnersuutaa ajugaasutut toqqarpaat. Ajugaasutut toqqarneqartup siunnersuutaa, “Sermitsiap Qilaataa”, Sermitsiamut eqqumiitsuliatut titartaariaatsimullu nersorinnissutaavoq, Kalaallit Nunaanni illoqarfiit pingaarnersaannut ilisarnaatitut kinaassutsitullu.
Suliniummi isumassarsiorfigineqarpoq kalaallit qilaataat Qilaat ammalortuulluni qaqqap tungaanut sammisumik ingerlaffeqarluni. Sanaartugassaq qisunnik atortunik ninngusuunik malunnaarsaartumik qaammaqqusersugaalluni suliarineqassaaq aamma isikkivittut, naapiffittut aamma kulturimut, ilinniarnissamut pinngortitamillu misigisaqarnissamut sinaakkutissatut atorneqartussatut ilusilersugaalluni – sumiiffik pinngortitamik, kulturimik ataatsimoornermillu misigiffiusoq.
Ajugaasutut siunnersuutigineqartup pitsaasumik oqaluttuassartaqarnera, eqqumiitsuliornikkut pitsaassuseqarnera aamma Nuummut malunnaatilimmik ilisariuminartumillu ilisarnaatitut atuussinnaanera tunngavigalugit toqqarneqarpoq. Kommunimit suliniutip siunertaa atuuffialu pitsaanerpaamik piviusunngortinniarlugit inaarutaasumik inissisimaffissaa pillugu suleriaqqinnermi Bilo Høegh Stigsen suleqatigineqassaaq.
“Sermitsiaq Nuummut ilisarnaataalluartuujuaannarnikuuvoq – qaqqaq eqqissinermik, nukittunermik kinaassutsimillu inissaqartitsisoq. ‘Sermitsiap Qilaataa’-nik pinngortitap kulturillu naapiffiannik qaqqamut kalaallillu qilaataanut nersorinninnermik pilersitsinissaq kissaatigaara. Suliaq ammasumik isikkiveqarluni ammasuussaaq kajungernarlunilu, tassani innuttaasut tikeraallu kinguaariit, oqaatsit kulturillu assigiinngitsut ataatsimoorsinnaassapput. Eqqarsaatersuuteqarfiusinnaasoq, sammisaqarfiusinnaasoq ataatsimoorfiusinnaasorlu – qaqqatsinnit qilaatitsinnillu ataatsimoortinneqartoq”, Bilo Høegh Stigsen oqarpoq.
Nuummi ataatsimoorfik
Borgmesteri Avaaraq Olsenip erseqqissarpaa, ilisarnaat Nuup kinaassusaanut ersarissumik ilisarnaataassasoq aamma innuttaasut naapeqatigiiffigisinnaassagaat illoqarfimmilu kulturimik pinngortitamillu misigisaqarfigisinnaassagaat.
“Innuttaasut tusarnaarpagut. Nuuk2035-p suliarineqarnerani innuttaasut ersarissumik ilisarnaateqarnissaq kissaatigaat – ataatsimoorfik issittumi illoqarfiit pingaarnersaattut kinaassutsitsinnut takussutissaq. Taamaattumik unammisitsineq aallartipparput massakkullu ajugaasoq nassaaraarput. Peqatigitillugu kulturikkut oqaluttuarisaarnermi illut pillugit ernumassuteqarnerit paasisinnaavagut kisianni kommunimit pigineqanngimmata toqqaannartumik iliuuseqarsinnaanngilagut. Suleqatigiinnissamulli piareersimajuaannarpugut. Anguniagarput suli allanngunngilaq: Oqaluttuarisaanitsinnut ataqqinnilluta innuttaasunillu oqaloqateqarluni Nuup ineriartortinnissaa,” Avaaraq Olsen oqarpoq.
Inissisimaffik suleqqinnissarlu
Ilisarnaat nutaaq Nuup qeqqani inissisimassaaq, tassani innuttaasunut tikeraanullu malunniutilimmik ataatsimoorfittut malunniutilittut avatangiisit ersarissaaqataasinnaassapput. Eqqumiitsuliortoq inissisimaffiusinnaasunik pingasunik siunnersuuteqarpoq, kommunimit siunnersuuteqartumik oqaloqateqarnikkut inissisimaffik naleqqunnerpaaq toqqarneqassaaq, inissisimaffik pinngortitami naleqartinneqartunut ataqqinnittoq peqatigitillugulu tikikkuminarnerulersitsisoq, taamaalillutik innuttaasut tikeraallu amerlanerusut suliap aamma qaqqamut Sermitsiamut isikkiviup misiginissaanut periarfissaqalissammata.
2024-mut missingersuutinut atatillugu Kommunalbestyrelsimit 5 millioner koruunit suliniummut immikkoortinneqarput, tamanna isumaqarpoq aalajangiineq politikkikkut aalajangiussaasoq.
Kommuneqarfik Sermersuumit Bilo Høegh Stigsen suleqatigalugu suliniummik piviusunngortitsinissaq qilanaarineqarpoq taamaaliornikkullu Nuuk tamakkerlugu nutaamik, ersarissumik isumassarsiorfiusumillu ataatsimoorfimmik pilersitsinissaq. Ilisarnaat eqqumiitsuliornikkut takussutissaannaassanngilaq kisianni illoqarfiup, kulturip pinngortitallu naapiffigissavaat, tassani innuttaasut tikeraallu Nuuk nutaatut peqataatitsiffiusutullu misigissavaat.