Kommuneqarfik Sermersuumit angajoqqaanngortussat angajoqqaanngorlaallu Arsugaq aqqutigalugu tapersersorneqarput, taanna isumassuisarfiuvoq ulluinnarni toqqissisimanermik, ataatsimoornermik nukissanillu pilersitsiviusoq.
Angajoqqaanngorneq inuunermut annertuumik sunniuteqartarpoq, nuannaarnermik qularnermillu pilersitsisinnaasoq. Ilaannut attaveqateqannginneq tapersersorneqannginnerlu angajoqqaanngornermi toqqissisimalernissamut ajornarnerulersitsisarput. Tamanna iliuuseqarfiginiarlugu Kommuneqarfik Sermersuumit Arsugaq pilersinneqarpoq, angajoqqaanngorlaanut angajoqqaanngortussanullu pinaveersaartitsinermut neqeroorut.
Tassani ataatsimooqatigiinnikkut, suliatigut tapersersuinikkut isumassuinikkullu angajoqqaanut meeqqanullu atugarissaarnerulernermik pilersitsisoqartarpoq. Maannamut peqataasut nukissaqarnerulernermik, kiserliorpallaarunnaarnermik imminullu naleqartinnerulernermik oqariartuuteqalereerput.
Angajoqqaanut meeqqallu nalerisimanissaanut siusinaartumik tapersersuineq
Kommuneqarfik Sermersuumi meeqqani ilaqutariinnilu atugarissaarnerup pitsanngorsarnissaanut pinaveersaartitsinermik suliaqartoqarpoq, tamanna kommunip meeqqanut ilaqutariinnullu politikkiani 2025-2035-mi pingaarnertut ukkataqarfiuvoq. Siusinaartumik suliniuteqarneq, tassa sapinngisamik siusinnerpaamik tapersersuinermik neqerooruteqarneq, pinaveersaartitsinermik sulinermi pingaarutillit ilagaat.
Suliamut ilisimasalinnit misigineqartarpoq, tapersersorneqarnissamik pisariaqartitsisut amerlasuut oqaloqatiginninnermik ingerlatsinermik aallartitserusunneq ajortut. Taamaattumik kommunimi sulisut Arsugaq pilersippaat, angajoqqaanngorlaanut angajoqqaanngortussanullu isumassuisarfik. Tassani toqqissisimaffiusumi suliatigut siunersioqatigiinnermut, pisortatigoortuunngitsumik peqatigiinnermut aamma tapersersorneqarnissamut periarfissaqarpoq.
Neqeroorummi innuttaasunut atugarliornissamut aarlerinaatillit, Siusissukkut Suliniuteqarfimmit innersuunneqarsimasut sullinniarneqarput. Isumassuisarfik uippakajaarnermik annikillisitsissaaq aamma angajoqqaajunermik ukkassinikkut peqataasut imminnut naleqartinnerannik pitsaanerulersitsissalluni. Sapaatit akunneri tamaasa peqataasut sulisut, ilaatigut tarnip pissusaanik ilisimasallit aamma psykoterapeutit peqatigalugit ullaakkorsioqatiginnermi naapittarput. Tassani misilittakkanik avitseqatiginnissinnaapput, siunnersorneqarsinnaapput tapersersorneqarlutillu aamma peqataasut allat peqatigalugit ataatsimooqataasinnaallutik. Tamatuma saniatigut ilisimasanik avitseqatiginninnissamut aamma peqataasunut ulluinnarni unammilligassat iliuuseqarfiginissaanut sakkussanik tunniussaqarnissamut suliamut ilisimasallit avataaneersut aggersarneqartarput soorlu ernisussiortut, peqqissaasut tarnillu pissusaanik ilisimasallit.
“Unammilligassat siusissukkut suussusersinerisigut saaffiginnissutiginerisigullu taava angerlarsimaffiup avataanut inissiisarnerit ikilisinneqarsinnaapput. Ilaqutariinnut siusissukkut tapersersuinikkut isumassuinikkullu atugarliornermik inissiisarnermillu pinaveersaartitsineq anguniagaraarput,” fagchefi Maliina Junge Jørgensen oqaluttuarpoq.
Peqataasunit pitsaasumik ineriartorneq siuariartornerlu misigineqarpoq
Arsugaq maaji 2025-mili ammarmat ersarissumik siuariartortoqarpoq peqataasuniillu nuannersumik utertitsiffiginnittoqarluni. Peqataasut oqaluttuarput, isumassuiffik sapaatip akunnerata aallartinnissaanut qilanaalersitsisartoq peqatigitillugulu nukissaqarnerulersitsisoq nukimmillu pilersitsiviusoq.
Ataatsimoornerup allani imminut ilisarisinnaanermut, misilittakkanik avitseqatiginnissinnaanermut aamma suliamik ilisimasalimmit tapersersorneqarsinnaanermut aqqutissiuunneqarsinnaanermullu periarfissiinera, aammalu kiserliornerup annikillinera oqaluttuarineqarpoq. Avataaniillu pulaarneqarneq aamma isumalerujussuusimasoq. Ilaatigut mindfulnessimik sungiusarnerit tagiartuinerillu peqataasut uippakajaarnermik annikillisitsinissaannut aamma ulluinnarni eqqissisimanerulernissaannut iluaqutaasimapput, suliatigullu ilisimasaqarnerup angajoqqaatut imminnut tatiginerulersippaat.
Peqataasut isumassuiffiup toqqissisimanartumik silaannaqarnera erseqqissaatigaat, tassani misigissutsit ajornartut pillugit ammarnissamut inissaqartitsisoqarpoq paasineqartutullu misigiffiulluni. Nuanninngitsumik eqqarsaateqarnermik annikinnerulersitsinermut iluaqutaavoq aamma meeqqap atugarissaarnerunissaanut ineriartornissaanullu inissaqarnerulersitsilluni.
“Arsugaq nuannersumik assersuutissaavoq, qanoq isumassuinerup, suliatigut ilisimasaqarnerup ataatsimoornerullu ingerlaqatigiissinnaanerannut. Suliamut ilisimasallit suliniummilu sulisut tunniusimasut immikkut ittumik qutsavigerusuppakka, taakku sapaatip akunneri tamaasa toqqissisimaffiusumik, qanilaarfiusumik ataqqinniffiusumillu pilersitsisarput. Minnerunngitsumillu angajoqqaat ataatsimoornermi peqataanissamut sapiissuseqartut qutsavigerusuppakka. Ammasuunerisa tunniusimanerisalu suliniut uummaarissuutippaat aamma uatsinnut isumaqarnerulersillugu,” fagchefi Maliina Junge Jørgensen oqaluttuarpoq.
Paasissutissat:
- Arsugaq maaji 2025-mi aallartippoq.
- Angajoqqaanngorlaanut angajoqqaanngortussanullu ernereernermi sulinngiffeqartunut neqeroorutaavoq.
- Peqataanissamut nalunaarneq innersuunneqarnikkut pisarpoq.
- Neqeroorut pillugu paasissutissat annertunerusut perusukkukkit aamma peqataanissamut innersuunneqarsinnaanerlutit paaserusukkukku peqqissaasut imaluunniit juumuut attavigiuk.