Kommuneqarfik Sermersuup Tasiilami eqqaanilu innuttaasut tusarnaarpai – iliuuseqartoqarporlu. Kommuni Tunumi pisunut soqutiginninnginnerarlugu Naleqqamiit kommunalbestyrelsemut ilaasortaq, Peter Utuange, oqarpoq, tamannali borgmesteri Avaaraq Olsenip ilumuunnginnerarpaa.
”Tasiilap nunaqarfiisalu unammilligassaat pillugit pakatsisimasoqarmat paasilluarsinnaavara. Isiginngitsuusaanngilluinnarpagulli. Akerlianik sumiiffimmi pingaarutilinnut aningaasaliisoqartarpoq, ineriartortitsiniarluta aamma atugassarititanik pitsanngorsaaniarluta siunnerfilimmik sulivugut,” borgmester Avaaraq Olsen oqarpoq.
Kommuneqarfik Sermersuup ingerlatsinermut aningaasartuutaasa 25 procentiisa missaat Tasiilamut nunaqarfiinullu atortarpai – tamanna sumiiffiup pingaartsinneqarneranut takussutissaalluarpoq.
Tasiilami ineriartortitsineq aningaasaliissutillu
Sumiiffimmi ineriartortitsineq ukiuni kingullerni pitsanngorsarniarlugu iliuuserineqartut tigussaasut amerlapput:
- Inissianik sanaartorneq aallartippoq: Tasiilami inissiat nutaat maanna sananeqarput, inissianillu amerlanerusunik pisariaqartitsineq piviusunngortinniarlugu kommuni sulissuteqarpoq.
- Najugaqalernissamut sungiusarnermik neqeroorut nutaaq: Containerit ineqarfiusinnaasut najugaqalernissamut sungiusarnermik neqeroorutaasut nutaat qanittumi piareernissaat ilimagineqarpoq. Neqeroorut inuusuttunut innuttaasunullu tapersersorneqarnissamik pisariaqartitsisunut iluaqutaassaaq, illoqarfimmilu inissaaleqinermut oqilisaataassalluni.
- Umiarsualivimmik pitsanngorsaaneq: Innuttaasut inuussutissarsiornermillu ingerlatallit isumannaatsumik avalassinnaanissaat tulassinnaanissaallu qulakkeerniarlugu umiarsualivimmik itinerulersitsiniarluni suliaqarneq aallartippoq.
- Sumiiffimi ilinniarneq: Tasiilami siunnersortit ikiortaattut ilinniarsinnaaneq siullermeerluni periarfissaalerpoq. Ilinniartut 20-t missaanniittut oktobarimi aallartipput.
- Takornariaqarneq inuussutissarsiornerlu: Inuusuttut arfinillit Mountain Leader Trainingimik ilinniagaq naammassivaat, tallimallu aasaakkut pinngortitami pisunnermi siulersortaasartutut allagartartaareerput.
- Siammarterineq aamma najukkami aqutsineq: Tasiilami kommuneqarfiup immikkoortuani ingerlatsisuusimasoq akisussaaffeqarnerulerluni immikkoortortaqarfimmi pisortanngorpoq. Taassuma saniatigut najukkami aalajangiisinnaassuseqarneq ingerlatsinerlu nukittorsarniarlugit immikkoortortaqarfimmi ingerlatsinermi pisortanngortitsisoqarpoq.
”Aalajangiussat innuttaasunut qaninnerunissaat kissaatigilluinnarparput. Taamaammat sumiiffinni ingerlatsineq ineriartortitsinerlu pitsaanerulersinniarlugu immikkoortortaqarfinni najukkami aqutsisut siuarsaaffigaagut – Nuummiinnaanngitsoq,” borgmesteri oqarpoq.
Tasiilaq pillugu politikkikkut siammasissumik suleqatigiinneq
Kommunip Tasiilami eqqaanilu aningaasaliineri suliniutaalu Inuit Ataqatigiinniinnaq aamma Demokraatiniinnaq aalajangiussaanngillat.
”Aningaasartuutissanittaaq isumaqatigiissuteqarnerni kingullerni Naleqqap peqataanera eqqaasitsissutigerusuppara, taamaattumillu Tasiilami suliniutinut politikkikkut akuerisanut peqataallutik. Tassa ineriartortitsineq politikkikkut siammasissumik suleqatigiiffiusumik tunngaveqarpoq,” Avaaraq Olsen naqissusiivoq.
Siunissaq ukkatarineqartoq
Kommuneqarfik Sermersooq Tasiilami eqqaanilu innuttaasunut inuussutissarsiortunullu nutaanik periarfissaqartitsilernissamik suliniuteqaqqissaaq.
”Suli unammilligassaqartoq nalunngilarput – iliuuseqarpugulli ataatsimoorpugullu. Tunumi ineriartortitsinissaq atugarissaarnissarlu pilersinniarlugit najukkami nukiit aamma sumiiffimmi innuttaasut peqatigalugit sulinerput nangissavarput,” borgmester Avaaraq Olsen oqarpoq.