Inuusuttut katillugit 39-t Kommuneqarfik Sermersuumit malinnaaffigineqarlutik ukiuni kingullerni tapersersorneqarput – suliniut inuusuttut inissineqarsimasut amerlanerusut inersimasutut namminneerlutik inuulernissaannut ikiorneqartarnerannut nukittorsaasuuvoq. Amerlanerpaat 18-inik ukioqalernertik inersimasutut inuunermut ikaarsaarfigisarpaat.
Taamali ikaarsaarneq inuusuttunut angerlarsimaffiup avataanut inissinneqarsimasunut imaluunniit peroriartornerminni inuuniarnikkut atugarliorsimasunut toqqissisimanaranilu annertuumik piumasaqaateqarfigineqartutut misigiffigisinnaasarpaat. Taamaattoqartillugu malinnaaffigineqarneq pingaarutilinnut ilaavoq.
”Inuusuttut amerlasuut naapittakkavut sivisunerulaamik inuusuttuunissaminnik pisariaqartitsisarput – naak pappiliatigut inersimasunngoraluarlutik. Imaassinnaavoq pingaarutilinnik assigiinngitsunik ilikkagaqarnissaminnut periarfissaqarsimanngitsut, soorlu akiligassanik akiliinermut imaluunniit ulluinnarni pilersaarusiornissamut. Tassani aqqutaanni ikiuutissaagut tapersersuillutalu – tamatigut naligalugit inuunerminnilu inissisimanerannik ataqqinnilluta,” malinnaaffiginninnermik suliallit ilaat oqarpoq.
Toqqissisimaneq, ataatsimoorneq periarfissallu nutaat
Malinnaaffiginninneq tassaannaanngilaq suliassanut tapersersuineq, aammali toqqissisimaneq, ingerlariaqqinneq aamma atassuteqarfiit pineqarput. Inuusuttut amerlasuut malinnaaffigineqarnertik siullermeerlutik peqataatinneqartutut misigiffigisarlugu oqaluttuartarput.
Inuusuttut malinnaaffigineqartut ilaat ima oqaluttuarpoq: ”Ajunngitsumik pitsaasumillu tapersersorneqarlunga aamma inersimasumik tulaaveqarsinnaallunga misigaanga. Malinnaaffigineqarnerma ajunngitsumik toqqissisimanartumillu nammineersinnaalernissannut sakkussaqalersippaanga. Inersimasunngornermi aqqusaagassat unammillernartut anigornissaannut amerlasuunik sakkussanippunga. Peqqinnarnerusumittaaq eqqarsarsinnaaneq ilikkarpara, oqaloqateqarluarlunga siunissamilu atorsinnaasannik paasisaqarlunga.”
Inuusuttut 39-t ukiuni kingullerni malinnaaffigineqarput, taakkunanngalu 14-it maanna naammassinnissimalerput – arlallit aalajangersimasumik suliffittaarput, ilinnialerlutik imaluunniit namminneq ineqalerlutik.
Suliniut iluatsittoq
Inuusuttut malinnaaffigineqarnerat nammineersinnaalernissamut, atugarissaarnissamut inuunerminnilu kajumissuseqarnerannut nukittorsaataavoq. Malinnaaffigineqartut inuusuttut arlallit imminnut uppereqqilersut, attaveqarfeqartalersut aamma namminneq inuunerminnut akisussaassuseqalersut, kommunimi sullissisunit malugineqartarpoq.
”Inuusuttut tapersersorneqarnertik ilinnialernissaminnut sapiillisitsisimasoq imminnullu upperinerminnut iluaqutaasimasoq oqaluttuaraangata, suliniut iluaqutaasartoq paasisarparput. Sullissisuttaaq ullut tamaasa tunniusimalluinnarlutik sulinerat nersualaassallugu eqqaamasariaqarparput – taakkoqanngippammi inuusuttut toqqissisimanermik misigisimanavianngikkaluarput, malinnaaffiginninnerullu inuiaqatigiinnut iluaqutaanissaanut piviusunngortitsisuummata,” fagchefi Maliina Junge Jørgensen oqarpoq.
Inuusuttut inersimasunngornissamut ikaarsaarnerminni tapersersugassat amerliartormata suliniutip ukiumi aggersumi suli annertunerulersinneqarnissaa Kommuneqarfik Sermersuup naatsorsuutigaa.
Kommuneqarfik Sermersooq malinnaaffiginnilluni suliniummik naammassinnilluarsinnaajumalluni pitsaanerulersitsinissamik siunertaqarpoq, taamaalilluni inuusuttut pisariaqartitsisut nammineersinnaanngornissaannut tapersersorluarneqarnissaat qulakkeerneqarniassammat.