Ittoqqortoormiineersut sisamat pikkorissaqataasut aqqaneq-marluk tungaanut amerlatigisunik ilaasoqarlutik angallassisinnaanermut allagartartaaqqammerput. Ilinniarneq illoqarfimmi takornariaqarnerup siuarsarnissaanut pingaaruteqarpoq aamma inuussutissarsiornermi aallarnissaanermilu nutaanik periarfissaqalersitsilluni.
Umiarsuarnut takornariartaatinut avatangiisinut aamma aserfallatsaaliinermut akitsuutit aqqutigalugit pikkorissarneq Kommuneqarfik Sermersuumit aningaasalerneqarpoq. Akitsuutit 2024-mi eqqunneqartut kommunimi takornariaqarnermut aamma takornariaqarnerup aaqqissuussaanerata siuarsarneqarnissaanut aningaasaliissutigineqartussatut siunertaqarput.
”Illoqarfimmi innuttaasut isumannaatsumik pitsaasumillu takornariaqarnermik ingerlatsinissaannut pisariaqartitaminnik piginnaaneqalernerat tulluusimaarutigaarput. Tamanna inuussutissarsiornermik aamma sumiiffimmi inuiaqatigiinnut nukittorsaataassaaq,” Visit East Greenlandimi takornariaqarnermi ataqatigiissaarisoq, Anna Burdenski oqarpoq.
Pikkorissaaneq Imarsiornermik Ilinniarfimmi Nuummiittumi ingerlanneqarpoq. Angalaniarnermi unammillernartoqarnera pissutigalugu pikkorissarneq marlunngorlugu avinneqarpoq, ilinniarfiulli aamma pikkorissaqataasut tunniusimanerat pissutigalugu pikkorissarneq naammassineqarpoq.
Pikkorissarnermi peqataasut maanna allagartartaartut tassaapput Avgo Barselajsen, Åge Danielsen, Martin Madsen og Gaba Abelsen.