Kommuneqarfik Sermersuumi angallannermut immikkoortortaqarfimmi sulisut Nuummi aqquserngit aqqusineeqqallu 360 gradinik kaajallassinnaasumik assiliivilerlutik assiliisaqattaaqqammerput. Assit Googlemut nassiunneqassapput, Google Street Viewimilu illoqarfiup assingata nutarterneqarneranut atorneqassapput.
Nuup Google Street Viewimi assingi qangali nutartigassanngoqqapput. Angallannermut nakkutilliinermullu immikkoortortaqarfimmi sulisut illoqarfimmi assiliiortuleramik eqqarsarsimapput iluatsiinnarlugu assilisaminnik Googlemut nassiussisinnaallutik, taamaalilluni Street Viewimi assit nutarterneqarsinnaaniassammata. Sulisut illoqarfiup aqquserngini assiliisaqattaareerput, ullumilu aqqusineeqqat aamma majuartarfiit arlallit tamanit atorneqarsinnaasut assilisaarneqarput. Assiliineerit Angallannermut nakkutilliinermullu immikkoortortaqarfiup angallannermut pilersaarusiortuanit, Emil Skat Vejleskovimit assilineqarput.
Angallannermut nakkutilliinermullu immikkoortortaqarfimmi sulisut aputaajaasalernissamut piareersarlutik assiliisaqattaarnissaat pilersaarutaareerpoq, taamaalillutik aputaajaannginnerminni suut apummit matusimaneqarnersut takusinnaajumallugit. Street View kommunimi sullissisunut aamma iluaqutitsialaassaaq, sumiiffiimmi assigiinngitsut nutartikkanik assitallit takusinnaanngussavaat, soorlu illut, aqqusinerni sinaakkutit, qulliit assigisaallu namminneq ornigutinngikkaluarlutik piffissartuutiginagulu takusinnaanngussagamikkit.
Inuit assingi aamma biilini nummerpladet Street Viewimi saqqummiussat Googlemit ersernerlulersitaassapput. Atuisulli arlaat assimik ersernerlulersikkusutaminik naammattoorsissagaluaruni Googlemut anngussinissaminut periarfissaqarpoq. Google Street Viewimi toornerit pingasut tooraanni periarfissat arlallit nuippata ’rapportér et problem’ toorneqassaaq. Taassuma kingorna allanngortikkusutap suunera toqqarneqassaaq – soorlu inummik allamillunniit ersernerlulertikkusutaqaraanni.
Angallannermut nakkutilliinermullu immikkoortortaqarfimmi sulisut kommunip inissiaataasa eqqaanni aqqusinernik aqqusineeqqanillu nakkutilliinerminni assiliisaqattaarput.
