Sapaatip-akunnerata aallartilaarnerani borgmesteri Avaaraq Olsenip Nuummi nutaamik sakkutuut umiarsuaannut talittarfissamik aamma Issittumi Sakkutooqarfiup qullersaqarfianik aalajangiisoqarnerata kingorna ernumassuteqarluni nalunaaruteqarnerata kingorna Nunanut Allanut Ilisimatusarnermullu Naalakkersuisoq, Vivian Motzfeldt (S) aamma Naalakkersuisunut siulittaasoq Jens-Frederik Nielsen (D) ataatsimeeqatigereersimalerpai.
Ataatsimiinnerit borgmesterip iliuuseqarsimaneranik ingerlanneqarlutillu Naalakkersuisunit tigulluarneqarput. Oqaloqatigiinneq maanna ingerlanneqarpoq, Naalakkersuisuniillu Kommuneqarfik Sermersooq Nuummilu innuttaasut suliaqaqqinnissamut peqataatinneqalissasut erseqqissaatigineqarpoq.
”Oqaloqatigiinnissamut iliuuseqarsimanera Naalakkersuisunit tigulluarneqartoq nuannaarutigaara. Innuttaasugut toqqissisimasutut misigissapput – isiginngitsuusaarneqartutuunngitsoq. Illoqarfik pillugu taama pingaaruteqartigisunik aalajangiisoqassatillugu kommune suleqatigineqartariaqarpoq innuttaasullu isumaat ataqqineqarlutik.
Borgmesterip isumannaallisaanerup annertusarneqarnissaa pisariaqartoq isumaqataaffigaa, aamma Kalaallit Nunaat nunarsuarmi pingaaruteqartutut inissisimasuusoq – taamaattorli suliniutit tamarmik innuttaasut inuiaqatigiillu ataqqillugit ingerlanneqartariaqartut erseqqissaatigalugu.
”Isumannaallisaaneq annertusarneqartariaqartoq paasilluarsinnaavarput, taamaattorli ungasinnerulersutut toqqissisimannginnermillu misigilersitsinata iliuuseqartariaqarpugut. Innuttaasunut maani najugaqartunut illoqarfitsinnullu ataqqinninnermut tunngavoq,” borgmesteri oqarpoq.
Ataatsimiinnerni sakkutuut umiarsuaannut talittarfik nutaaq aamma Issittumi Sakkutooqarfiup qullersaqarfia nutaaq qanoq pilersinneqassanersut Nuuk illoqarfittut ammasutut, uummaarissutit peqataatitsisutullu tapersersorlugu – sakkutooqarnikkut sakkusiornertut ersersitsisuunngitsumik- oqaluuserineqarpoq.
Borgmesterip suliamik aallartitsinermi innuttaasut toqqissisimasutut, ataqqineqartutut aamma ataqatigiittutut misigisimanissaat pingaartinneqarlunilu Namminersorlutik Oqartussat, kommunip aamma Illersornissaqarfiup akornanni suleqatigiinneq ammasumik peqataatitsivillunilu ingerlanneqartariaqartoq erseqqissaatigaa.
”Sulinerup ingerlariaqqinnissaanut suliallu ingerlanneqarnissaa ammasuussasoq Naalakkersuisunit uppernarsarneqarpoq. Suleqatigiinnerup aallartinnissaanut taamatut alloriarneq pingaaruteqarluinnarpoq, tassa innuttaasut peqatigalugit aalajangiisoqartassaaq – qulaaniillu aalajangiisoqartassanngilaq,” Avaaraq Olsen oqarpoq.