Danmarkimi naalakkersuisut nunatsinnilu Naalakkersuisut akornanni illersornissamut isumaqatigiissut nutaap malitsigisaanik Nuummi illersornissaqarfiup suliaqarnerinut aningaasaliissutaasussat Nuummi Imarsiornermik Ingerlatallit Attaveqaataanit pitsaasumik isigineqarput.
Attaveqaataasut naatsorsuutigaat, kommune peqatigalugu suleriutsimi akuutinneqassallutik, taamaalilluni umiarsualiviup allilerneqarnissaanut sakkutooqarnermilu suliniutinut tunngasunik aalajangiinissaq najukkami ingerlatitsisut qanimut oqaloqatigalugit piniassammat. Aningaasaliinissamut pilersaarutit najukkami inuussutissarsiornikkut periarfissanik imaqarput aamma Kalaallit Nunaata Issittumi periusialimmik atuuffeqarneranut iluaqutaassallutik.
Illersornissaqarfiup ujartugai amerlasuut assassornermut tunngasut, piginnaasat aamma ingerlataqarfiit iluaqutaasinnaasut Nuummeereerput. Taamaattumik NMN-imit qilanaarineqarpoq, Illersornissaqarfik qanimut suleqatigalugu taakku suliassaqarfiit ineriartortissallugit, taamaalillugu imarsiornermut tunngasunik suliassaqarfik imaanilu suliffissuaq tamaat kivinneqarniassammat – Kalaallit Nunaata Illersornissaqarfiullu suliassaasa suliarineqarnissaannut iluaqutaasumik.
Peqatigitillugu sakkutuut talittarfissaat utaqqiisaasumik aaqqiissutaasutut NMN-imit isigineqarpoq. Issittumi Sakkutooqarfiup umiarsuai siunissami ungasinnerusumi aalajangersimasumik tulaffissaqalernissaat pillugu pingaaruteqassusaa Attaveqaataasut tikkuarpaat – Qinngutta kangerluttaa qimallugu Kangerluarsunnguullu eqqaaniittoq immikkoortoq qaninnerullugu.
“Aningaasaliissutaasussat tikilluaqquagut aamma najukkami suliaqartut, kommune Issittumilu Sakkutooqarfik akornanni qanimut suleqatigiinnissamut qilanaarpugut,” Nuummi Imarsiornermik Ingerlatallit Attaveqaataani siulittaasoq Cuno Jensen oqarpoq.
“Peqatigitillugu neriuppugut, siumut isigalugu piffissaq ungasinneq eqqarsaatigineqarsinnaassasoq, taamaalilluni sakkutooqarnermi suliniutit illoqarfimminngaanniit ungasinnerusumut nuunneqarniassammata, taamaalillunilu Qinngutta kangerluttaa innuttaasunut imarsiornermullu tunngasunik inuussutissarsiornikkut periarfissat ammarniassammata..”
Nuummi Imarsiornermik Ingerlatallit Attaveqaataat takorluukkanik saqqummiussaminni immikkoortup tungaatigut Kangerluarsunnguaq siunissami ineriartorfissatut toqqareerpaat. Attaveqaataasut neriupput, Issittumi Sakkutooqarfik immikkoortumut aqqusinniornissap piviusunngortinnissaanut tapersiissasoq, tamannalu illersornissaqarfiup suliaanut najukkamilu inuussutissarsiortunut iluaqutaasinnaassavoq.
Suleqatigiinneq ataatsimullu ineriartortitsineq aallaavigalugit Nuummi Imarsiornermik Ingerlatallit Attaveqaataasut kissaatigaat, aalajangikkanut peqqissaartumik sunniuteqarsinnaassasut, aalajangikkat tassaallutik Nuuk nutaaliatut, piujuartitsisutut illoqarfimmi umiarsuaqarfissuartut ingerlalluartutut ineriartornissaanut qulakkeerinnittuusut – innuttaasunut, inuussutissarsiortunut illersornermullu iluaqutaasunik.