Autisme aamma ADHD pillugit Nuummi ippassaq ullumilu isumasioqatigiittoqarpoq. Ilinniagallit aamma innuttaasunut marlunnik innarluutilinnut qanigisaasut kiisalu aalajangiisartut katillutik 150-it missaanniittut ilisimasaminnik, misilittakkaminnik aamma eqqarsaatiminnik avitseqatigiipput.
Isumasioqatigiinnerup siunertaraa autisme aamma ADHD pillugit paasisimasaqarnerulernissaq aamma nunatsinni siunnersuinerup tapersersuinerullu nukittorsarneqarnissaat. Sammisat pingaarutillit ulluni marlunni ukkatarineqarput, soorlu innarluutip suussusaanik paasisaqarneq, siusissukkut iliuuseqarneq, atuarfimmi peqataatitsineq aamma ersinngitsumik innarluuteqarluni inuuneq.
Peqataasut teoriimut tunngasunik aamma ulluinnarni sakkussanik paasisaqarput, aamma ilungersunartut aaqqiissutillu eqqartorneqarput. Isumasioqatigiinneq kalaallisut danskisullu ingerlanneqarpoq aamma toqqaannartumik nutserisoqarluni, taamaalilluni amerlasuut pitsaasumik peqataatinneqarlutik.
Saqqummiisut ilagaat meeqqanik minnernik autismeqartunik immikkut sammisaqarluni perorsaasoq siunnersortaatigisorlu Trine Andreasen aamma tarnip pissusaanik immikkut ilisimasalik, Niina Isaksen, ersinngitsumik innarluuteqarneq pillugu saqqummiivoq.
Nunatsinni inunnik autismeqartunik ADHD-qarlunillu peqataatitsineruniarluni pitsaanerusumillu tapersersuiniarluni sulineq uani isumasioqatigiinnermi siuarsarneqarpoq.
Aaqqissuussaq Kommuneqarfik Sermersuumit aamma Namminersorlutik Oqartussanit aningaasalerneqarpoq.
