Atuarfik Inussuup sananeqarluni naammassineqarnissaanut pilersaarut, Kommuneqarfik Sermersuup aamma sanaartornermik suliffeqarfiup Ístakip isumaqatigiissutigaat. Isumaqatigiinneq suliniutip siuariarnissaanut pingaaruteqarpoq, isumaqatigiinnginnerimmi pissutigalugit ikuallattoqarnerani sillimaniarnermut tunngatillugu suliaq ilaatigut sivisuumik uninngasimavoq.
Ikuallattoqarnerani sillimaniarneq pillugu isummat assigiinnginnerat aamma teknikkikkut aaqqitassat ilungersunarmata, Atuarfik Inussuup sananeqarnera piffissami sivitsortumi unittooqqavoq. Pisoq illua-tungeriinnut tamanut naammaginanngilaq – minnerunngitsumik atuartunut, ilinniartitsisunut aamma angajoqqaanut atuarfiup nutaap atulernissaanut qilanaaqisunut.
Kommuneqarfik Sermersooq aamma Ístak ataatsimoorussillutik taperseeqatigiillutillu isumaqatigiikkamik illua-tungeriit maanna ataatsimut pilersaarusiorput. Pilersaarusiornikkut sanaartornerup ingerlaqqissinnaanngornera qulakkeerneqarpoq, ikuallattoqarneranilu sillimaniarnermut tunngasut suli aaqqinneqanngitsut iluarsineqassapput. Ikuallattoqarnerani tissaluttaatit maanna sanaartornermi ikkussuunneqarnissaat ilaatigut isumaqatigiissutaavoq.
Suliaq annertuvoq, maannali isumaqatigiissusiortoqarneratigut Atuarfik Inussuup aggusti 2026-mi atuartunit iserterfigineqarsinnaanngornissaa ilimanarsivoq.
– ”Suliaq tamanut ilungersunarlunilu unammillernarsimavoq. Maannali ataatsimoorluta aaqqiissuteqarnitsigut sanaartornerup siuariarnissaa qulakkeerneqarmat nuannaarutigaara. Ataatsimoorluta anguniagarput erseqqippoq – meeqqanut sulisunullu sinaakkutinik pitsaanerpaanik pilersitsinissarput, taamaalilluni atuarfik 2026-mi atulersinnaanngorniassammat,”, Kommuneqarfik Sermersuumi Sanaartornermut Avatangiisinullu Ingerlatsivimmi pisortaq, Søren Krog Pedersen oqarpoq.
Ístakip Kommuneqarfik Sermersuullu ataatsimoorlutik aaqqiissutissaqalernertik aamma atuarfiup naammassineqarnissaanut sulinerup ingerlateqqissinnaanngornera naammagisimaarluarpaat.
– ”Teknikkimut tunngatillugu assigiinngitsunik isumaqarsimavugut, paaseqatigiiffiusumilli oqaloqatigiippugut, pilersaarusiarlu sanaartornerup naammassinissaanut aallaavigisassarput isumaqatigiissutigaarput,” Ísatakimi pisortaaneq, Karl Andreassen oqarpoq.
Isumaqatigiissuteqarnikkut suliniut erseqqinnerusumik toqqissisimasumillu ingerlateqqinneqarsinnaanngorpoq. Ataatsimut anguniakkanik ukkataqarluni sulineq maanna ingerlaqqissinnaanngorpoq: Atuarfik Inussuk toqqissisimanartoq, nutaaliaasoq aamma illoqarfiup meerartaasa ilikkagaqarnissaannut atuarfik najoruminartoq..