Atuarfik Samuel Kleinschmidtimi (ASK) inini arlalinni oqummik nassaartoqarnera pissutigalugu matueqarallarpoq, Kommuneqarfik Sermersooq aalajangerpoq. Atuartut sulisullu peqqissusaat illersorniarlugu isumannaallisaalluni matusisoqarpoq.
Atuarfik Ukaliusami (USK) assingusumik nassaartoqarnerata kingorna atuarfik septembarimi matuneqarpoq. USK matuneqarsimatsiartoq ASK misissorneqarpoq, tamatumunnga pissutaalluni atuarfik assingusumik sanaajummat aamma silaannarissarfilersugaanera assingummat.
”Pilertortumik akisussaassuseqartumillu iliuuseqarpugut. Meeqqat sulisullu peqqissusaat salliutinneqartuaannarput. Isumakululertoqarnera paasisinnaavarput, atuartitsinerilli unitsinneqaratik ingerlaannarnissaat anguniarlugu tamaviaarpugut,” borgmester Avaaraq Olsen oqarpoq.
Oquup nassaarineqartup qanoq annertutiginera pissutaalu paasiniarlugit, kommuni teknikkikkut sukumiisumik septembarip naalernerani misissuisitsivoq. Misissuisoqarnerata nalaani atuartut tamakkiisumik atuartinneqaannarsinnaaqqullugit atuartitsinerit ininut allanut nuunneqassapput.
Angajoqqaat sulisullu toqqaannartumik nalunaarfigineqarput, pisullu kommunip nittartagaani Facebookimilu quppernerani ingerlaavartumik paasissutissiissutigineqartassapput.
”Uani pisumi angajoqqaat sulisullu paasinninnissaat suleqataanissaallu kissaatigaarput. Ilimaginngisatsinnik pisoqarpoq, meeqqalli toqqissisimanartumiitinniarlugit suleqatigiippugut,” borgmester Avaaraq Olsen naggasiivoq.