Kommuneqarfik Sermersuup Atuarfik Samuel Kleinschmidtimi (ASK) illup iluani silaannaata misissorneqarnerata inernerisa nalunaarusiaat suli utaqqivaa. Avataaniit misissuititsinerup inernerisa nalunaarusiaat sapaatip akunnerata tulliani piariissangatinneqarpoq.
Misissuinerup inerneri piareernissaata tungaanut atuartitsineq nalinginnaasumik ingerlaannassaaq, kommunimiillu atuartut sulisullu illersorneqarsinnaasumik atuarfimmiissinnaanerat pingaartinneqarpoq.
“Avammut attaveqarnitsinni ammasumik eqqortumillu attaveqaqateqarusuppugut. Pingaarnerpaavorlu meeqqat ulluinnarni toqqissisimanissaat, paasisaqarnissatta tungaanut,” Meeqqanut Atuarfeqarnermullu Ingerlatsivimmi pisortaq Lone Nukaaraq Møller oqarpoq.
Ullumikkut atuartitsineq illersorneqarsinnaasumik ingerlanneqarsinnaajunnaassagaluarpat, taava kommuni atuartitsivissanik pilersaarusioreerpoq. Pilersaarut piffissap sivikitsup iluani atuutilersinneqarsinnaavoq aamma angajoqqaat inuiaqatigiillu toqqaannartumik kingusinaarnertaqanngitsumik paasitinneqarnissaat piareersimatinneqarluni.
“Mianersornissamik tunngaveqarluni sulineq ingerlapparput pisariaqalissappallu iliuseqariataarnissamut piareersimalluta. Meeqqat sulisullu peqqissusaat pingaarnerpaavoq taamaattumillu nalunaarusiap takutissagaluarpagu pilersaarusiaq erngertumik atuutilersinnaasoq piareersimasuutigaarput,” Meeqqanut Atuarfeqarnermullu Ingerlatsivimmi pisortaq Lone Nukaaraq Møller oqarpoq.
Teknikkikkut immikkut ilisimasallit avataaneersut nalunaarusiaat piareeriarpat Kommuneqarfik Sermersooq atuarfimmi sulisunut, angajoqqaanut aammalu tamanut paasititsiumaarpoq.