Uanga allatuulli nutaarsiassatigut paasivara, danskit naalagaaffiat Nuummi Umiarsualivimmut aningaasaliiniartoq— qularnanngitsumik Issittumi Sakkutooqarfimmut immikkut umiarsualiviliorniarneq pissutigalugu. Tassunga tunngasumik suli paasitinneqannginnama sumiitinniarneqarnersoq suli naluara. Tassunga tunngasumik oqaloqatigiinnerup ingerlateqqinneqarnerani kommunitut soorunami akuutinneqartariaqarpugut, illoqarfitsinnummi siunissaanullu sunniuteqaqataasussaavoq.
Qinngutta kangerluttaani sakkutooqarfik annertujaamik umiarsualiveqarnissaa paasinnittaasera naapertorlugu Nuummut annertuumik allannguisitsissaaq. Tamanna inuiaqatigiinnut sakkulersortuunngitsunut eqqissisimasumullu sungiusimananngilluinnartutut misinnassaaq — allannguineq illoqarfiup oqaluttuarisaaneranik allarluinnarmut nikeriartitsinerussaaq, illoqarfippummi niuernikkut, kulturikkut ulluinnarnilu inuunermi ammasutut uummaarissutullu ippoq. Nuuk kinguaariinni uummateqarfigalugu umiarsualivik ungalullugulusooq ineriartortinneqarpoq. Qinngutta kangerluata qeqqinnarsuani sakkutuunut talittarfiliorneq illoqarfiup ilisarnaataanut naapertuutiinnanngilaq aammali illoqarfiit pingaarnersaanni innuttaasunut takusassianngussaaq — ullut tamarluinnaasa eqqaasinneqaatigisassallugu sorsunnermik, sakkussialersornermik sakkutuulersornermillu, tamakkulu illoqarfitsinni pingaartinneqartut mumingarluinnaraat. Nuummilu taamatut ineriartortitsinissaq kissaatiginngilara.
Kialluunniit takorloornikuunngilaa, sakkutooqarneq illoqarfitsinni ulluinnarni ullullu tamaasa qanoq initutigilissasoq. Iluamik oqaatigalugu illoqarfitsinni innuttaasut akornanni inituallaalereerpoq. Tamanna pillugu naatsorsuutigilluinnarpara pisariaqartunik oqaloqatigiinnernut piaartumik akuutinneqalernissarput— innuttaasuinnaanngitsoq aammali kommunalbestyrelse, imarsiornermik inuussutissarsiortut, pingaartumik Nuummi imarsiornermik ingerlatallit attaveqaataat sinerlugu peqataasussat. Ilisimavara, NMN Nuummi umiarsualiveqarneq tamaat isigalugu takorluukkamik pilersaarusiorsimasoq
Nuummi umiarsualivik aallaavigalugu illoqarfik ineriartortinneqarnikuunera ataqqilluinnarlugu tamanna pivoq — tamannalumi kinguaariikkuutaani illoqarfimmut ilisarnaataalersimavoq qitiulluinnartoq — taamaattumillu kommune inuussutissarsiutillillu akuutinneqarnissaat inissaminiilluinnassaaq. Uagummiuna illoqarfipput, kulturerput siunissarpullu. Taamaattumik anguniagalimmik ataqqeqatigiiffiusumillu oqaloqatigiittoqartariaqarpoq, peqatigiilluta aaqqiissutissarsiornissarput ammaallugu.
Naalagaaffeqatigiinnerup isumannaallisarneqarnissaa pillugu ataqqeqatigiilluni suleqatigiissutigineqarnissaa kissaatigaara, suleqatigiinnermili Nuuk illoqarfiit pingaarnersaat nukittunerulersinneqarnissaannik — sanngiinnerulersinnagu — suleqatigiittoqassaaq. Inuiaqatigiit eqqissisimasumik inuuneqarnermik misigitinneqarnissaannut annertunerulersitsinissaanik aallaaveqassaaq, sorsunnermut sakkussialersuinerunermillu aallaaveqartinneqassanngilaq, taamaaliornikkummi ataatsimuussutitsinnik innarleerujussuassaaq.