Nuup eqqaani illuaqqanik oqquiffissanik qulisanik nutaanik sanasoqassaaq, ataatsillu sumiiffissaa Danmarkimi Isumaginninnermut Ineqarnermullu ministereqarfimmit aallartitat ippassaq alakkarpaat.
Aallartitat borgmesteri Avaaraq Olsenimit aamma kommunaldirektørimit Ole Jakobsenimit tikilluaqquneqarput, tikittunut ilaalluni Danmarkimi Isumaginninnermut Ineqarnermullu ministeri, Sophie Hæstorp Andersen.
Illuaqqat oqquiffissat qulisat aqqaneq-marluk assigiinngitsunik angissusillit sananeqassapput, ilaat anginngitsut oqquiffissiaanerusut, ilaallu 60 kvadratmeterisut angitigissallutik, taakkulu assigiinngitsunik atortoqassapput. Ilaat unnuiffigineqarsinnaassapput, ilaat ikumatitsiveqarlutik kissassimaarfiusinnaasut, ilaallu qaannanut inissiiveqassallutik. Oqquiffissat qulisat sumi inissisimaffigisinnaasaat apeqqutaalluni isikkivik kusanangaartoq saallugu oqquisoqarsinnaassaaq.
Oqquiffissap qalisap sumiiffigisassaa illoqarfimmut qaninnerpaasussaq Saqqarlerniittoq, borgmesterip danskillu aallartitaasa ullumi alakkarpaat. Oqquiffissaq taanna timmissanik isiginnaarnermik nuannarisalinnuunerusoq iluaqutaassaaq. Allat amerlanerpaat Nuup eqqaaniunerusoq inissisimassapput. Marluk Quassussuarmiissapput, marlullu Ukkusissamiissallutik. Ataaseq Nuup Akianiissaaq, allalu ataaseq Kapisilinni Kangersunerup tungaanut isikkiveqassalluni.
Nuummi Najukkami Ataatsimiititaliaq aamma Visit Nuuk ilaatigut suliniuteqartuupput. Nuummi Najukkami Ataatsimiititaliami ilaasortaq, Finn Meinel, suliniut pillugu oqaluttuarluni peqataavoq aamma oqquiffissat inuit amerlanerusut pinngortitamiikkusunnerulernissaannut ajornannginnerulersitsissasut, pinngortitami sammisassaqarsinnaanermut sivisunerulersitsissasut kiisalu takornarialerisunut iluaqutaanissaat nassuiaatigaa.
Kommuneqarfik Sermersooq aamma Kalaallit Nunaanni Pinerluttunik Isumaginnittoqarfik suleqatigiinnissamik siorna isumaqatigiissuteqarput, tassani ilaatigut Nuummi pineqaatissinneqarsimasunut inissiisarfimmiittut kommunip oqquiffissat qulisaataasa aserfallatsaalineqartarnissaanni ikiuuttarnissaat isumaqatigiissutaavoq. Taamaammat Kalaallit Nunaanni Pinerluttunik Isumaginnittoqarfimmi pisortaq, Christian Høygaard peqataavoq, pineqaatissinneqarsimasullu qanoq iluarsaassisarnissani aamma oqquiffissanik qulisanik nutaassanik aserfallaatsaaliisassanerat nassuiaatigalugu.
Illuaqqat oqquiffissat qulisat aappaagu upernaakkut sanaartorneqalernissaat pilersaarutaavoq.
