Najugaqartoq, puiguttortunut immikkoortortami najugaqartoq marlunngornermi unnuakkut igalaamit nakkarpoq kingornatigullu peqqissaavimmi toqukkut qimagulluni.
Alianartumik ajutoortoqarnera Utoqqaat Illuanni najugaqartup inuuneranik akeqarpoq. Marlunngornerup unnuaani ulloq 23. September, najugaqartoq utoqqaat illuanni puiguttortunut immikkoortortaqarfimmut attuumassutilik, quleriinni siullerni igalaamit nakkarpoq.
Sulisut ikiueqqaarnermik ingerlatsipallapput ambulancemillu aggertitsinerup nalaani najugaqartoq attaveqarfigaat. Naak iliuuseqapallattoqaraluartoq najugaqartoq peqqissavimmi marlunngornermi ullaakkut toquvoq.
”Tamatta pisoq tupassutigeqaarput, siullertullu ilaqutaasunut qanigisaasunullu asasaminnik annaasaqartunut misiginneqataanerput apuukkusupparput,” Ejner Grønvold, Suliffeqarnermut Isumaginninnermullu Ingerlatsivimmi pisortaq, oqarpoq.
Nangippoq: ”Sulisut iliuuseqapallannerannut aamma pisumi ilungersunartorsiornartumi sulisutut qisuariarnerannut qujaffigerusuppakka. Pisoq sulisunut tamanut misigissutsitigut ilungersunarsimavoq, taamaattumillu immikkut ilisimasalimmit ikorfartorneqarnissaminnik neqeroorfigineqassallutik.”
Utoqqaat illuanni errortuisarfimmi igalaakkut nakkarneq pivoq. Sumiiffinni, puiguttortut ulluinnarni nakkutigineqaratik isersimaffigisinnaasaanni igalaat allallu annerfigisinnaasaat nalinginnaasumik isumannaallisarneqartarput.
Ejner Grønvold naggasiivoq: ”Isumannaallisaaffiusinnaasut suut tamaasa isumannaallisaaffigisinnaanngilagut. Tamanna isumaqarpoq, sumiiffinni minitaqarluni najugaqartunit annerfigineqarsinnaanerinut ilimanaateqarsinnaaneri nalilersuisoqartuaannartoq. Errortuisarfimmi igalaap isumannaallisaataa equngasimavoq, ikkusimanerlulluni. Tamanna piaarnerpaamik isumannaarneqarpoq, aamma suleriaasigut qulaajarneqaqqipput.”
Kommunimit toqusup ilaqutaanut qamannga pisumik misiginneqataanerput ingerlateqqipparput.