Kommuneqarfik Sermersuumit aalajangerneqarpoq sunngiffimmi sammisassaqartitsiviit Miniklubbi, Inneruulat aamma Qajaasaq matuneqarallassasut, Ukaliusap Atuarfiata oqoqarnerata paasineqarnerata kingorna init atuarfittut atorneqarallassammata.
”Meeqqat inuusuttullu atuarnerat qulakkeerneqaqqaassaaq. Taamaattumik sunngiffimmi sammisassaqartitsiviit initai atorneqarallarnissaat aalajangerparput. Ilutigalugu aaqqiissutaasinnaasunik ujarlerpugut, taamaalilluni sunngiffimmi sammisassaqartitsiviit sumiiffinni allani ingerlaannarniassammata,” Meeqqanut Atuarfeqarnermullu Ingerlatsivimmi pisortaq Lone Nukaaraq Møller oqarpoq.
NUIF aamma Illu suli aammaannassapput
Pingaaruteqarpoq erseqqissaatigissallugu, sunngiffimmi sammisassaqartitsiviit NUIF aamma Illu ammaannassammata aamma ammasarfiit sivitsorneqarlutik. NUIF ullut tamaasa ammasalissaaq, ILLU-lu ataasinngornerni kisimi matoqqasalerluni.
Tamatuma saniatigut utaqqiisaasumik periarfissanik amerlanerusunik pilersitsinissaq kommunimit sulissutigineqarpoq, taamaalillutik meeqqat inuusuttullu sammisassani peqataaginnarsinnaassammata ataavartumik aaqqiissummik nassaartoqarnissaata tungaanut.
Meeqqat inuusuttullu ilorrisimaarnissaannik pingaartitsineq
Naak pisoqarnera allannguititsigaluartoq, Kommuneqarfik Sermersuumit anguniarneqarpoq meeqqat inuusuttullu sunngiffimmi sammisassanik pitsaasunik neqeroorfigineqaannarnissaat. Allatut aaqqiissutit inissinneqariarpata angajoqqaat aamma atuisut ilisimatinneqassapput.
”Nalunngilarput sunngiffimmi sammisassaqartitsiviit meerarpassuarnut inuusuttorpassuarnullu pingaaruteqarluinnartuusut. Taamaattumik naapiffeqaannarnissaannut aamma piffissami tassani soqutigisaminnik aallussiinnarnissaannut ilungersuussilluta sulivugut,” Lone Nukaaraq Møller oqarpoq.