Kommuneqarfik Sermersuumit illup oqunneranik paasisaqareernerup kingorna Atuarfik Ukaliusap piaartumik matuneqarnissaa aalajangerneqarpoq. Atuartut sulisullu illersorniarlugit aalajangerneq pivoq.
”Meeqqat sulisullu toqqissisimasumik peqqinnartumillu avatangiiseqarnissaat qulakkeerniarlugu sukkasuumik iliuuseqarpugut. Pingaarnerpaatipparput. Utaqqiisaasumik aaqqiigallarnitsinni paasinninneq suleqatigiinnissarlu kissaatigaarput” borgmester Avaaraq Olsen oqarpoq.
Utaqqiisaasumik aaqqiinerit
Ataasinngorneq ulloq 29. septembarimiit atuartitsineq atuartitsiviugallartuni ingerlanneqaleriissaaq.
Atuartut nukarliit ataasinngornerup 29-ata tungaanut atuareernerup kingorna ornittakkami paarineqassapput, taakkunani sumiiffinni nutaani atuartitsineq aallarteqqinneqassaaq
Angajulliit ataasinngornerup tungaanut angerlarsimassapput, ataasinngornermiillu
atuartitsiffissaat ForældreIntrakkut nalunaarutigineqassallutik.
Kommunimit sapinngisamik ajornaquteqanngitsumik angallassinerit, atuarfimmi nerisassat aamma atuartitsivusunukarsinnaanissaat qulakkeerniarlugit sulisoqarpoq.
Atuartitsineq ingerlaannassaaq – isumannaatsuuneq ukkanneqarpoq
Nuunneq ulluinnarni allannguinernik pilersitsigaluartoq atuartitsineq pilersaarutitut ingerlanneqassaaq. Angajoqqaat, atuartut sulisullu klassit ataasiakkaat sumut takkutissanersut pillugit toqqaannaq paasitinneqassapput.
”Nalunngilarput tamanna unammilligassaqartitsiumaartoq kisianni meeqqanut ulluinnaat toqqissisimanartuunissaannut allanngorartuunnginnissaannullu sapinngisamik iliuuseqassaagut. Angajoqqaanit sulisunillu suleqatigiinneq misigileriigarput qutsatigeqaarput,” borgmester Avaaraq Olsen oqarpoq.