Tasiilami atuartut 9.klassertut Nuummut uani qaammammi tikeraaramik, illoqarfik qaninnerulersutut misigaat.
14-inik ukioqarluni Kitaa Tasiilamiit ungasittutut misiginarsinnaavoq. Periarfissaqarnera tusartareerpaat. Takunikuunngilaalli, taamalu inuusuttuaraatigigaanni nunatta kitaa nunarsuup illuaniippasissinnaavoq. Tasiilami Alivarpiup 9.klassertut kitaani periarfissanik misigisaqartikkumallugit Nuummut angalatippai.
Atuartut kitaamiusut oqalullutik Nuummi atuarlutik misilippaat, meeqqallu atuarfiata kingorna periarfissat suuneri takuaat, nunatsinnilu tamat oqartussaaqataanerat pillugu paasisaqarlutik.
Palle nunarsuarmi kisimiittoq
Tasiilami najugallit 10. klassep kingorna ingerlaqqinniaraangamik kitaanukartarput. 10.klassemiillu ingerlaannaq ilinniaqqinniaraanni 15-inik ukioqarluni nunagisamiit nunap illua-tungaanukartoqartarpoq. Sungiusimasallu tassanngaannaq ungasissorujussuanngortarput.
”Palle nunarsuarmi kisimiittutut misiginalaarsinnaavoq,” Tasiilami atuarfimmi ilinniarneq pillugu siunnersorti, Rose Sørensen oqarpoq.
Rose Sørensen angalaqataavoq. Taassuma Tasiilami atuartut kitaanut nuunnissaminnut pissangalersut arlaleriarluni saammarsartarpai.
”Qanoq innissaa takorlooruminaassinnaavoq. Annilaangagaannilu ajortuinnaat eqqarsaatigineqalersoortarput,” taanna oqarpoq.
Atuartut GUX-imut aamma Nuummi kollegianut pulaarput. Pulaarnerit iluaqutaasimasut Rose Sørensen nassuiaavoq. Sumiiffiup takunera aamma inuisa naapinnerat iluaqutaavoq.
”Eqqissisimanerulerput,” taanna oqarpoq.
Oqaatsit sungiusimanngeqisat
Kitaani kitaamiusut oqaluttariaqarneq atuartunut inuusuttuaqqanut unammillernarsinnaavoq. Atuartut kitaamiusuullaqqinnerulernissaminnut sapiissuseqalernissaat angalanermi siunertat ilagaat. Kitaamiusut oqaasii pitsaanerulersinniarlugit sapaatip-akunnerani Nuummiinneranni atuarfimmi ullaap-tungaani atuartinneqartarput.
”Kitaamiunik oqaluussaqaraangamik maanna ammanerulersut tusaasinnaavara,” Rose Sørensen oqarpoq.
Atuartuttaaq kitaamiunik ikinngutitaarput allaqatigiittarlutillu. Kitaamiutullu oqalunnissaminnut sapiissuseqarnerulerput. Roselu kitaamiuusoq aperiniaraangamikku kitaamiusut oqalullutik aperisinnaanngorput.
”Siornatigut ajornakusooraluarpoq,”, taanna oqarpoq.
Ilinniarneq siunissarlu
Tasiilami ilinniarsimasunik sulisussaqarnerulernissaq maanna angalanermi anguniakkat aamma ilagaat. Atuartut suliffeqarfinnut pulaarnerminni Royal Arctic Linemut pulaarput, ilinniarnerlu qanoq iluaqutitaqarsinnaanersoq paasivaat.
Assersuutigalugu truckinik ingerlatitsisunngorniaraanni allagartaqarfiussasoq maanna paasivaat. Joystikkiiliinnarluni pisoqarsinnaanngilaq. Ilinniaqqaartoqartariaqartoq takusinnaalerpaat,” Rose Sørensen oqarpoq.
Nunatsinni tamat oqartussaaqataanerat pillugu Inatsisartunut pulaarnerminni paasisaqarput. Siornatigut fjernsynikkuinnaq pisartutut isigisarpaat. Inatsisartulli ataatsimiittarfianni pulaarnerminni takorloorsinnaanerulerpaat.
”Takusimanngikkaanni takorlooruminaassinnaavoq,” Rose Sørensen oqarpoq.
Tasiilami inuusuttuaqqat 9.klassertut siunissami periarfissarpassuatik allallu pillugit maanna takusaqarsimalerput. Ukiut tamaasa taamatut angalatitsisalernissaq Tasiilami Alivarpiup neriuutigaa.
