60-inik imaluunniit sinnerlugit ukioqarpit? Kommunitsinnilu utoqqaat atugaannik soqutiginnippit? Taava massakkut Kommuneqarfik Sermersuumi Utoqqaat pillugit Siunnersuisoqatigiinnut ilaasortanngornissannut periarfissaqarputit.
Kommuneqarfik Sermersuumi 2013-imiilli Utoqqaat pillugit Siunnersuisoqatigeeqalerpoq. Utoqqaat pillugit Siunnersuisoqatigiit tallimanik ilaasortaqarput arlalinnillu sinniisoqarlutik.
Utoqqaat pillugit Siunnersuisoqatigiit siunertaraat:
- kommunip utoqqarnut tunngasunik politikkimik ilusilersuineranut piareersaasiorneranullu atatillugu kommunalbestyrelsimut siunnersuisartutut atuunnissaq
- kommunimi innuttaasunut utoqqarnut tunngasunik oqallinnermi peqataanissaq
- kommunimi innuttaasut utoqqaat kommunalbestyrelsillu akornanni attaveqaatitut atuunnissaq
- kommunimi innuttaasut utoqqaat atugarisaat pillugit paasissutissiinermik siuarsaaneq
- kommunimi peqatigiiffinnik, atuisut siunnersuisoqatigiivinik suleqatigiikkuutaanillu kommunimi utoqqaat atugaannik pitsanngorsaaniarlutik sulisunut suleqataanissaq isumassarsiornissarlu
- sulinikkut utoqqaat namminneerlutik aalajangiisinnaanermik pisinnaatitaaffeqarnerannut, sunniuteqarnerannut inuunerminnilu assigiiaartumik atugassaqartitaanissaannik siuarsaanissaq
Utoqqaat pillugit siunnersuisoqatigiit inunnut ataasiakkaanut pissutsinik ilanngullugit apeqquteqaatinik, suliani inunnut tunngasunik, naammagittaalliuutinik il. il. suliaqartassanngillat.
Kommuneqarfik Sermersooq ilaasortassanik tallimanik ujaasivoq – sapinngisamik kommunemi tamakkerlugu agguataarsimasunik. Utoqqaat pillugit siunnersuisoqatigiit ukiumut 4 – 6-riarlutik naapillutik imaluunniit oqarasuaatit/ videokonference atorlugit ataatsimiittarput.
Inuttut ataasiakkaatut imaluunniit peqatigiiffik sinnerlugu qineqqusaarnissamut periarfissaqarpoq. Siunnersuisoqatigiinnut ilaasortaaneq nammineq kajumissuseq tunngavigalugu aamma akissarsiaqanngitsumik atuuffiuvoq.
Kajumigigukku qinnuteqaatit uunga nassiuguk si@sermersooq.gl kingusinnerpaamik oktobarip 17-ani 2025.
Utoqqaat pillugit Siunnersuisoqatigiit pillugit uani paasisaqarnerusinnaavutit – https://sermersooq.gl/kl/committee/utoqqaat-siunnersuisoqatigiiffiat/ – ilaatigut tassani nanisinnaavatit Utoqqaat pillugit siunnersuisoqatigiit ileqqoreqqusaat, imaqarniliat assigisaalu.