Kalaallit Nunaanni Upalungaarsimasut upalungaarsimanermillu ingerlatsinermi atortut ullumi Nuummi Qatserisartoqarfimmi saqqummiunneqarput. Peqataasut ilaat tassaapput Danmarkimi Minister for Samfundssikkerhed og Beredskab (Danmarkimi inuiaqatigiit isumannaatsuunissaannut aamma upalungaarsimanermut ministeri)
Kommuneqarfik Sermersuumi Upalungaarsimanermut pisortaq tunualersoq Jes Damgaard Andersen Kalaallit Nunaanni aamma kommunimi upalungaarsimanerup aaqqissuussaaneranik, qanoq angitigineranik saqqummiussivoq – aarlerinaataasinnaasunik nalilersuineq aallaavigalugu nassuiaateqarpoq – kiisalu attaveqaasersuutit aarlerinartumik inissisimasinnaanerannik passussineq oqaluttuaralugu.
Torsten Schack Pedersen paasissutissinneqarpoq ilaatigut Naalakkersuisoq Bentiaraq Ottosen kiisalu Kommuneqarfik Sermersuumi Kommunaldirektøri Ole Jakobsen peqatigalugit.
Upalungaarsimanermut pisortap tunualersup saqqummiussinermini immikkut pingaartillugu eqqartorpai Kalaallit Nunaanni qatserisartut ilinniartinneqarneranni tapersersuinerup pingaaruteqassusia.
”Piffissami matumani ilinniagaqarneq uagutsinnut pingaaruteqarluinnarpoq. Aqagu unammilligassatsinnut piareersimasariaqarpugut,” Jes Damgaard Andersen oqarpoq.
Jes Damgaard Andersenip atuuffini Jens Mikkelsenimut ingerlateqqippaa. Saqqummiussinerup kingorna qatserisartoqarfimmi pulaartut upalungaarsimanermut pisortanngortussamit takornariartinneqarput. Tassani pulaartut ilaatigut qatsissumi annaassiniartartunik, qaqqani annaassiniartartunik aamma suut qaavini annaassiniartartunik oqaloqateqarput.
Torsten Schack Pedersen aamma Bentiaraq Ottosen qatserisartut atisaanik misiliinissaminnut periarfissinneqarput Kommuneqarfik Sermersuumi upalungaarsimasut kingullertut pisaarisimasaannik misiliiumallutik. Seqqalittaatigaluni killuut Kalaallit Nunaanni siulleq upalungaarsimasunit ungasinngitsumi pigineqalerpoq – sakkoq taanna tassaavoq naqitsineq sakkortoorujussuaq atorlugu imermik seqqalittaalluni betonimik saviminermillu killuut, taanna atorlugu iikkat aamma matut tunuanni ikuallattumik qatserisoqarsinnaavoq.
