Pilersitsivik Majoriarlu Imarsiornermut Ilinniarfiup illorsuanut upernaaq nuupput. Ilinniartitsiviit pitsaanerusut suleqatigiinnerlu eqaannerusoq innuttaasunut ilinnialerusuttunut pitsaanerusumik periarfissiissaaq.
Pilersitsivik Majoriap ataani ingerlasoq Paamiuni Imarsiornermik Ilinniarfimmut upernaaq nuupput. Utoqqaat angerlarsimaffikuaniit nuunneq sinaakkutinik pitsaanerusunik soorlu init ilinniartitsiffiit nutaaliaanerusut innuttaasunut ilinnialerusuttunut pitsaanerusumik tunniussisinnaanermik kinguneqarpoq.
“Utoqqaat angerlarsimaffigisimasaat ilinniartitsinermut tulluarsagaanngilaq. Taamaammat Imarsiornermut Ilinniarfiup init ilinniartitsiffiinik atuisinnaalernerput assut pitsanngoriaataavoq,” Majoriaq Paamiuni ningiu Naja Jakobsen unnersiorpoq.
Pilersitsivimmi ilinniartitsineq kulturitsinnut tulluarsagaavoq. Allattarfiit takisuunillu allanneq aallaaviunngilaq, assaalli atorlugit sulineq tunngaviulluni. Ilinniartut piniarnermik aalisarnermillu misilittagaqarnissaat pingaartinneqarluni, piniarnermut aalisarnermullu atortut suliarineri aamma ilaalluinnarluni.
“Kalaallit Nunaanni kulturitsinnut tulluarsakkamik ilinnialernissamut piareersarnertut isigineqarsinnaavoq. Assaat atorlugit ilinniarneruinnanngilaq, ilinniartut piffissaq eqqorlugu takkuttarnissamut, isumaqatigiissutinik eqquutsitsinissamut suleqatigiinnissamullu ilinniartarput – taakkumi ilinniarnermi sulinermilu pingaaruteqarluinnartumik aalajangiisuusarput,” Pilersitsivimmi aqutsisoq Kornelia Poulsen oqarpoq.
Pilersitsivik Majoriaq ataaniippoq, Majoriamilu karakterinik qaffassaasoqarsinnaavoq taamaasillunilu ilinniaqqinnissamut aqqutaalluni, assersuutigalugu imarsiornermut ilinniarniaraanni. Pilersitsiviup ilinniarnissamut piareersarfittut aammalu Majoriami atuagarsorluni ilinniarsinnaaneq Paamiuni innuttaasut illoqarfitsik qimanngikkaluarluni ilinniarnissaminnut piareersarsinnaanerat periarfissatsialaavoq.
“Pilersitsivimmi Majoriamilu aaqqissuussat nutaajupput, aaqqissuussarlu Nunatsinnut aammalu illoqarfitsinni periarfissat aallaavigalugit pilersinneqarpoq, taamaattumik isumalluarpugut ingerlalluarnissaanik,” Naja Jakobsen naggasiivoq.
Ilinniarfiit pingasut illup ataatsimi inissisimalernerata iluaqutissartarissavaa nukittuffiit assigiinngitsut atorluarnerulersinnaanerat aammalu piareersarnermiit ilinniagaqalernissamut ataqatigiissarluarneqarsinnaanerat.