Paamiuni inuit innarluutillit ornittagaanni Nuilaami aasaq manna aammaarlutik ulapissimapput. Nuilaaq aasaanerani umiarsuit takornariartaatit tikikkaangasa takornarianiit ornigarneqarluartarpoq. Ornittakkami atuisut sanalukkaminnik tuniniaasarput, taakkunanullu ilaavoq Ane-Sofie Steenholdt.
Ane-Sofie Steenholdt 2018-imi sklerosemik nappaateqarluni paasivaa.
“Nappaateqarluni paasillugu aallaqqaammut sakkortuvoq, taamaakkaluartoq akuerinikuuara, akuerineralu uannut oqilisaataaqaaq,” Ane-Sofie oqaluttuarpoq.
Paamiuni inuit innarluutillit ornittagaat Nuilaaq assigiinngitsorpassuarnik periarfissaqartitsivoq. Sukisaarsarfiusarpoq kisianni aamma sanalorujoornissamut periarfissaqarluni.
“Pingaartittupilussuuarput atuisugut inuit innarluutillit inuiaqatigiinnut akuulluarnissaat. Taamaammat allat assigalugit sammisaqarsinnaanissaat pingaartipparput. Assigiinngitsunik sammisaqartoqarsinnaavoq aamma illoqarfimmut kusassaataasinnaasunik suliaqaqatigiittarpugut, assersuutigalugu ikaartarfissuatsinni allagartaliinerit aamma inissiarsuit iigaani qalippakkanik ikkussuinerit,” Nuilaami pisortaq Andrine Jensen oqaluttuarpoq.
Atuisut ataatsimut suliaqartarnerat saniatigut ataasiakkaarlutik sanalussinnaanerat periarfissaavoq, tamannalu atorluarneqartaqaaq. Assassortartunut ilaavoq Ane-Sofie Steenholdt.
“Maani sukisaarsarujoortarnerma saniatigut sanalorujoortarpunga. Siornatigut nappaateqalinngikkallaramali sapangaaqqerisarpunga, suli taakku aalluppakka kisianni aamma allanik sanaluttalernikuuvunga. Qisunnik, sapangaaqqanik aamma tuttut nassiuinik iverusiortarpunga, taakkulu takornarianiit piumaneqartaqaat,” Ane-Sofie oqaluttuarpoq nangillunilu;
“Tulluusimaarnartaqaaq nammineq sanaat inunniit piumaneqaraangata. Misiginikuuara siornatigut pisisimasoq tikeqqissimalluni pisiniaqqittoq. Maani tuniniaagaangatta aggorsimasunik taamaallaat tigusisarama, takornariat aggorsimasuuteqanngeriaraangamik Pilersuisumut aggortitsiartupallattarput,” Ane-Sofie qungujulaajutaa unnersiorpoq.
Nuilaami atuisut sulisullu sanalutsillutik tapersersoqatigiillutillu ikioqatigiilluartarput. Assersuutigalugu suliat qanoq atanertunerusinnaanerat misilittakkatik aallaavigalugit siunnersueqatigiittarlutik.
“Maani (Nuilaami) taamatut periarfissaqartinneqarnerput assorsuaq nuannerpoq. Sulisuniit aamma maaneeqatigisartakkanniit tapersersorluarneqartarnerput naliitsuuvoq, ulluinnannullu oqilisaataalluartarluni,” Ane-Sofie Steenholdt naggasiivoq.