Inuusuttorpaaluit aggerfiit assigiinngitsuneersut assoroornartoq Mountain Leader Training juulimi naammassivaat – allagartartaarput, nutaanik ilikkagaqarlutik ataqatigiillualerlutillu.
Mountain Leader Training Tasiilami juulip 14-ianiit 25-ata tungaanut iluatsilluartumik naammassineqarpoq. Inuusuttut arfinillit tassani naammassisaanni nunani tamalaani piumasaqaatit Union of International Mountain Leader Associationsimeersut (UIMLA) aallaavigineqarput. Taakkunannga tallimat aasaanerani pinngortitami pisunnermi angallassisartutut qaffasissuseq 1 allagartartaarfigaat, ataaserlu qaffasissuseq 2-mi angusilluni.
”Taanna ingerlatarput pitsaalluinnartumik sunniuteqartoq takusinnaavarput. Peqataasut inuttut ineriartorput, arlallillu suliffittaarlutik imaluunniit inuusuttut ilinniarfiinut qinnuteqarlutik. Sungiusarnerinnaanngilaq – amerlasuunummi allannguisuuvoq,” Sustainable Now Greenlandimi suliniutinut pisortaq aamma aaqqissueqataasoq, Søren Skov oqarpoq.
Angallassisartunngorlaat siulersortigalugit takornarianut pisuttuartitsisinissamik sumiiffimmi aaqqissuusinissanik pilersaarusiortoqareerpoq. Suliniulli takornariaqarnermuinnaq tunnganngilaq – siunissamulli aamma neriuuteqarneq pineqarpoq.
”Peqataasut inuummarissisut akisussaassuseqarnerulersullu takusarpagut. Inuiaqatigiinni maligassiuisunngussapput, illoqarfimmullu nukittorsaataassaaq,” Hans Poul Andersen, suleqatigineqartartunit inuusuttut kulturikkut illuannit Igdlomeersoq oqarpoq.
Paasisimasaqarluni najugaqartullu peqataatillugit sungiusarneq
Inuusuttut oqaatitsigut piginnaasaat qaffassarniarlugit aamma nunani tamalaani takornariaqarnermi sulilersinnaanissamut pitsaanerusumik periarfissaqartitsiniarluni ilinniartitsineq tuluttut ingerlanneqarpoq. Najugarisamittaaq kulturi oqaluttuarisaanerlu pingaartillugit ilinniartitsisoqarpoq, soorlu Tasiilami katersugaasivimmik suleqateqarnikkut.
Mountain Leader Trainingimik ilinniartitsineq inuusuttut kulturikkut illuat Igdlo, ´Tasiilami Suleqatigiippugut´, Sustainable Now Greenland, sumiiffimi takornarialerisut aamma Skotlandimiut suliniaqatigiiffiat ’The Polar Academy’ suleqatigiillutik ingerlappaat. Ilinniartitsinermi ilitsersuisut ’The Polar Academy’-meersuupput.
Siunissamut isigineq
Peqataasut arlallit oqaatigaat sungiusarneq suli qaffasinnerusumik ingerlateqqikkusullugu – aamma uani misilitsinnermi angusinngikkaluartut.
”Misilitsinnermi uani angusinngilanga, kisiannili ilikkagaqaqaanga. Nammineq inuttut ilikkagaqarpunga, qaqugumullu ikinngutigiuaannagassannik kammalaatitaarpunga. Nutaamik misiliinissannut sapiissuseqalersippaannga,” Paamiuneersoq Juaannguaq Rosing oqarpoq.
Mountain Leader Trainingip nunatsinni ilinniarfinngorluni pilersinneqarnissaa maanna suliniutigineqarpoq. Nunani tamalaani qaffasissuseq assigalugu inuusuttut amerlanerusut inuuniutigalugu pinngortitami angallassisartunngorsinnaanissaannut periarfissaqalersitsissaaq – taamatuttaaq takornariaqarneq siuarsarneqassaaq inuusuttullu pinngortitamut inuiaqatigiinnullu atassuteqarnerat nukittorsarneqassalluni.
”Inuusuttut ilinniarnerminni siuariartornerat takullugu nuaneqaaq. Nutaanik ilikkagaqaannanngillat, aamma imminut tatiginerulerput ikinngutitaartorlutillu. Takullugu kajumilersitsivoq,” nunap immikkoortuani pisortaq Hjørdis Viberg oqarpoq.
Suliniut ukunannga aningaasaliiffigineqarpoq: Kommuneqarfik Sermersooq, Det Nissenske Familie Fond, Kreamers Grønlandsfond aamma PH-Outdoor, taakku sungiusarnermi atortunik pisarialinnut assartuinermullu tunngasunik piviusunngortitseqataapput.
