Ukiorpassuit klubbimi sulisut ilungersorlutik sulereersullu qajartortartut klubbiannit Tasiilap avannaatungaani nunaqarfimmit GM-imi arlalinnik ujaminnattoqarpoq.
Qajartortartut klubbiat Tsaqqid Peqatigiiffik Tiilerilaaq ukiormanna qaannamik nunatsinni pissartanngorniunnermi bronzennappoq, sølvinnappoq gultinnallunilu.
Medaaliat katillugit aqqaneq marluk pissarsiarineqarput. Guldit tallimat, sølvit marluk, bronzet marluk, kajumissaammik tunineqartut marluk internationalimillu ataaseq.
”Gultinnannikkut, sølvinnannikkut aamma bronzennannikkut klubbimi inuusuttut qajartortartut siunnerfilimmik sungiusarneq, ataatsimoorfiusumi aamma piumassuseqarfiusumi nuna tamakkerlugu qanoq angusaqarfiusinnaanersoq takuteqqippaat, tamannalu Tasiilamut Tunumilu tamarmi annertuumik pisuunnguallaataavoq,” Magnus Kristiansen Tasiilami Sammisassaqartitsivimmi Kulturimilu immikkoortortami aqutsisoq oqarpoq.
Klubbimi aqutsisoq Max Yves Audibert ukiorpassuit ingerlaneranni klubbip ineriartorneranut aallussilluartuusimavoq. Tunniusimangaarluni sungiusaasutut, aaqqissuussisutut, aningaasaliisussarsiortutut maligassiuisutullu atuuffiit tigummivai. Iliuuseqarnermigut nunaqarfimmi meeqqat inuusuttullu nunatsinni qajartoriaatsimik angusarissaarnissamullu periarfissippai.