ATAATSIMIISITSINISSAQ TAAMAATIINNARPOQ TIMMISARTOQ TIKINNGITSOORNISSAA PEQQUTAALLUNI. INNUTTAASUNIK ATAATSIMIISITSINISSAQ UKIARIAANI KINGUSINNERUSUKKUT INGERLANNEQASSAAQ –
Kommuneqarfik Sermersooq Paamiuni aggustip arfineq-aappaanni ”Siunissami Paamiut” qulequtaralugu Taqqissuummi innuttaasunik ataatsimiisitsinissamut aggersaavoq.
Ataatsimiisitsinerup siunertaraa Paamiut illoqarfianut periusissiornissamik suliaqarnissaq pillugu kommunimiit saqqummiussisoqarnissaa, sulinerup ingerlanerata ammasumik ingerlanneqarnissaa aammalu innuttaasut isumaannik paasiniaalluni peqataatitsinissaq.
Borgmesteri Avaaraq Olsen aamma kommunalbestyrelsemut ilaasortaq Dorthe-Marie Mogensen-Fontain peqataassapput. Pilersaarummi ilaatigut ilaapput illoqarfiup nukittuffiginerpaasai unammilleruminaannerillu eqqartorneqarnissaat kiisalu Paamiut ukiuni tulliuttuni qulini qanoq ineriartortinneqarnissaanut isumassarsianik katersinissaq.
Ataatsimiinneq pissaaq Taqqissuummi nal. 18.30-miit 21.15-ip tungaanut.
