Sapaatip akunnerata tulliani issittuni kommunit borgmesterii Nuummi katersuutissapput, illoqarfik Arctic Mayors Forum-ip ataatsimeersuarnerani qaaqqusisoralugu.
Kommuneqarfik Sermersooq – Avaaraq Olsen siuttoralugu – issittumi kommunit 19-it akornanni nunat tamalaat suleqatigiiffiata ataatsimeersuarneranut atatillugu ataatsimeersuarnermi siulittaasoqarfimmik tigusissaaq.
”Nunat issittumiittut borgmesterii uagut kommunitsinnut tikilluaqqusinnaallugit ataqqinaataavoq, aamma Nuup kommunillu immikkuullarissumik pinngortitaqarnerata takutinnissaa. Peqatigitillugu isittumiittugut unammillernartitatsinnik eqqartueqatigiinnissarput qilanaarivara,” borgmesteri Avaaraq Olsen oqarpoq.
Kommuneqarfik Sermersuup aqutsisuunerata nalaani Arctic Mayors Forum-imi piujuartitsineq, takornariaqarneq, ilinniartitaaneq pingaarnertullu: eqqarsartaatsikkut peqqissuuneq ukkatarineqassapput.
”Eqqarsartaatsikkut peqqissuuneq qulequtaavoq issittumi borgmesterit aamma ukkatarissallugu kissaatigisaat. Tamatuma eqqumaffigiuarneqarnissaa pisariaqarpoq,” Avaaraq Olsen oqarpoq.
Arctic Mayors Forum-ip nammineq ataatsimeersuarnissaa marlunngornermi aggustip ulluisa 5-iani ingerlanneqassaaq. Borgmesterit immikkullu ilisimasallit arlallit ulloq sioqqullugu Arctic Frontiers Abroad peqataaffigissavaat, taanna issittumi siunissaq pillugu eqqartueqatigiiffigalugu ataatsimeersuarneruvoq. Ukioq manna Arctic Mayors Forum-imut atatillugu ingerlanneqassaaq.
- Ataasinngorneq ulloq aggustip ulluisa 4-t: Umiarsuaq tingerlaataannalik Norgemeersoq Statsraad Lehmkuhl ullup ingerlanerani Arctic Frontiers Abroad-imut qaaqquneqartut inissisimaffigissavaat. Unnukkut Nuup Katersugaasiviani ilassinneqatigiinneq ingerlanneqassaaq.
- Marlunngorneq aggustip ulluisa 5-iat: Issittuni illoqarfiit borgmesterii aamma Arctic Mayors Forum-imi allatseqarfik Kommunip allaffiani ataatsimeersuarnermi peqataassapput. Tassani Kommuneqarfik Sermersuup pisortatigoortumik oqallittarfiup siulittaasuuffigineqarnera tigussavaa.
Kommuneqarfik Sermersooq Arctic Mayors Forum-imi siulittaasuussaaq 2027-p tungaanut.