Kommuneqarfik Sermersuup peqatigiiffinnut kulturimut, sunngiffimmi timersornermullu tunngatillugu tapiissutinik qinnuteqartunut inatsisit nutarterpai. Inatsisit nutaat aggustip aallaqqaataani 2025-mi atuutilissapput, inatsisillu 2023-meersut maanna atuuttut atorunnaassallutik.
Allannguuteqartitsinermi anguniagaavoq kommunip tapiissuteqartarnerani peqataatitsineruneq, erseqqissuuneq aamma aalajangersimasumik agguaaneq, taamaalilluni innuttaasut amerlanerusut sunngiffimmi aaqqissuussani peqqinnartuni isumaqarluartunilu peqataanissaminnut periarfissaqarniassammata.
”Nutaanik inatsisiliornitsigut tapiissutit siammasinnerusumik amerlanerusunullu iluaqutaanissaat qulakkeerusupparput. Kajumissutsiminnik sulialippassuit innuttaasutsinnut ullut tamaasa sammisassaqartitsisarnerat uagut kommunitut tapersersussallugu akisussaaffigaarput,” borgmesteri Avaaraq Olsen oqarpoq.
Peqataatitsineq meeqqanillu ukkatarinninneq
Sakkortuumik timersornermut aningaasaliissutaasarsimasunik allanngortitsineq allanngutit annersaannut ilaavoq, tassa aaqqissuussat inuit immikkut pisariaqartitsisut peqataaffigisinnaasaat tapersersorniarlugit taamaaliortoqarluni. Taamaalilluni aningaasaliissutit 3 procentii suliniutinut aallarnisakkanullu innuttaasut inuunermi, aningaasaqarnikkut imaluunniit peqqissutsikkut unammillernartoqartitsisut peqataaffigisinnaasaannut siunissami aningaasaliissutaasinnaanngussapput.
”Peqatigiiffiit aaqqissuussisarnerat innuttaasut sammisassaqarnerannut pingaarutilinnut ilaavoq. Ataqatigiiffiusarput, nuannisarfiullutik aamma ukiut tunuliaquttallu apeqqutaatinnagit ataatsimoorfiulluartarlutik,” Avaaraq Olsen oqarpoq.
Meeqqattaaq inuusuttullu iliuuseqarfigineqarneruniarput. Meeqqat 18-it inorlugit ukiullit peqataasinnaaqqullugit akiliutaasartup appasitsinnissaanik imaluunniit akeqannginnissaanik peqatigiffiit inatsisini nutaani kajumissaarneqarput. Aammattaaq ilaasortanut suli 18-iliineqanngitsunut marloriaammik tapiissuteqarsinnaanngornikkut, ilaasortaanermut tapiissut meeqqanut inuusuttunullu samminerulerpoq
Taassuma saniatigut peqatigiiffiit taperneqarsinnaasut atuanngiffeqarnerup nalaani minnerpaamik ataasiarlutik akeqanngitsumik akunnernik sisamanik sivisussusilimmik meeqqat inuusuttullu tamarmik – aamma ilaasortaanngikkaluartut – peqataaffigisinnaasaannik aaqqissuisaannassapput. Taakku aaqqissuussat kommunip nittartagaani Sammisassat.gl-imi tamanut takuneqarsinnaallutik siunissami saqqummiunneqartarnissaat nutaartaavoq.
Aaqqiissutit nutaat tulleriiaarinerillu
Puljet aningaasaliissutaasartuttaaq agguataarneqarnerat aaqqissorneqarpoq:
- (Pulje 1) – Aningaasaliissutaasartut 82 procentii peqatigiiffinnut suli tunniunneqartassapput, puljelli iluanni agguataarnerat allanngorluni:
- Angalanermut tapiissut 75 %-imiit 70 %-imut appartinneqarpoq.
- Ingerlatsinermut tapiissut 10 %-imiit 5%-imut affaannanngortinneqarpoq, peqatigiiffinnilu tamani agguataaneqarlutik
- Ilaasortaanermut tapiissut 15 %-miit 25%-mut qaffanneqarpoq, meeqqat inuusuttullu immikkut salliutillugit
- (Pulje 2) – Tapiissutit 3 procentii aaqqissuussanut inunnut immikkut pisariaqartitsisunut peqataatitsisunut tapiissutaassapput
- (Pulje 3) – 15 procentit atuanngiffeqarnerup nalaani aaqqissuussanut tapiissutaassapput
”Peqatigiiffinnik suleqateqarluarneq upperaarput aamma tapiissutinnannikkut innuttaasunut aaqqissuussanik isumaqarluartunik pilersitsinissaaannut tatiginnippugut. Inatsisit nutaat tamanut peqatigiiffilerinermik suli soqutigisaqarnerulernissamut periarfissagissaarnerulersitsissasut neriuutigaarput,” Avaaraq Olsen oqarpoq.
Angalanermuttaaq tapiissutit nutaamik inatsisiliorneqarput. Tulleriiaarineq erseqqinnerusoq atorneqalissaaq, tassa meeqqat inuusuttullu suli 18-iliineqanngitsut aamma soraarnerit angalanissaminnut 100 %-imik tapiiffigineqarsinnaanngussapput, inersimasullu 80 %-imik tapiiffigineqarsinnaanngussallutik. Peqatigiiffiit angalanissaminnut ukiumut annerpaamik marloriarlutik tapiiffigineqarsinnaassapput, holditut imaluunniit ataasiakkaatut. Angalanerit aappaat tulleriiaarinermi salliutinneqassanngilaq, angalanerillu pingajuat tapiiffigineqarsinnaassanani.