Paamiut kujataatungaani umimmaat 19-it ukioq ataatsip matuma siornagut nuunneqarmatali siullermeersumik takuniaasoqarmat paasinarsivoq umimmaat peqqissuusut ajunngitsullu.
Umimmaat 2024-mi Ivittuuniit Iluilaarsuup eqqaannut nuunneqarput, misissuinerlu naapertorlugu umimmaat imungarsuaq siammarsimapput – nunniffiusumiit allaat 50 kilometerit angullugit. Imaappoq, umimmaat siammarsimapput Iluilaarsummiit Kangerluarsuk tikillugu.
“Misissuinermi paasinarsivoq, suli piaqqiorsimanngitsut, kisianni marluk ilumittut takuneqarput ungasinngitsukkullu piaqqinissaat ilimanarpoq. Takornartaanngilaq umimmaat eqimattat piaqqiulernissartik sioqqullugu piffissami sivisuumi sumiiffimminni sungiussiniaqqaartarmata. Umimmaat siaruarsimaqaat, kisianni maannakkut takusinnaavarput eqimattanngoqqissimasut. Kusanaqaat, peqqipput ajunngeqalutillu – suli umimmaat 19-iupput, nuutinneqaramilli taamak amerlatigalutik,” piniarnermik nakkutilliisoq Per Nukaaraq Hansen oqarpoq.
Suliniummi tamaani uumasut assigiinngisitaartuunissaannik pitsanngorsaasoqarnissaa kisimi anguniarneqanngilaq, kisianni aamma sumiiffimmi piniarneq siunissamilu imminut pilersornissamut periarfissanik nutaanik pilersitsiniartoqarpoq. Taamaattumik aamma nuannaarutaavoq suliniut Paamiormiunit qanimut tunniusimaffigineqarluni malinnaaffigineqarmat:
“Qiimmaallannarpoq uppernarsillugulu Paamiormiut eqqaminni nutaanik uumasoqalernera qanoq iluatigitigigaat paasillugu. Amerlasuut uumasoqatigiinnik malinnaalluarput uatsinnullu nalunaaruteqartarlutik. Suliniutip iluatsilluarnissaanut tamanna pingaaruteqarluinnarpoq – ataatsimoorluta umimmaat paarilluassavagut amerliartornissaannullu pitsaanerpaanik atugassaqartitaanissaat pilersissallugu,” Susanne Bisgaard Rasmussen, Kommuneqarfik Sermersuumi suliniummi aqutsisoq oqaluttuarpoq.
Umimmaat qanoq tamaani innerat ukiuni aggersuni nangittumik misissorneqartassaaq, peqqissusiat, siammarternerat amerliartornerallu qanimut malinnaaffigineqassalluni.
