Kommuneqarfik Sermersuumit pisortatigoortumik asfaltiliorfik, Nuummi Mittarfiup allilerneqarnerani sanaartornermut atatillugu Munckikkunniit pilersinneqarsimasoq tiguneqarpoq. Tunniussineq mittarfiliornermi immikkoortumik pingaarutilimmik naammassinninnermik malunnartitsineruvoq peqatigitillugulu kommunip attaveqaasersuutinik suliaqarneranut periarfissanik nutaanik ammaassilluni.
Asfaltiliorfik nutaaq, kommunimit tiguneqartoq, kommunip maannamut pigisimasaanit malunnaatilimmik angineruvoq. Pingasoriaatipajaavanik pisinnaasaqarnerunermigut asfaltiliorfiup kommunip Nuummi aqqusinernik aserfallatsaaliinissaanut aqquserniornissaanullu pitsaanerusumik periarfissippaa.
Innuttaasut aqqusinerni pitsanngoriaatit malugissavaat.
Ukiuni kingullerni Nuummi aqqusinernut tunngasut unammillernarsimapput, taakkualu innuttaasut akornanni ilungersunartorsiortitsipput. Kommuneqarfik Sermersuumit massakkut naatsorsuutigineqarpoq asfaltiliorfimmik tigusineq illoqarfiup aqquserngini malunnaatilimmik pitsanngoriaateqartitsissasoq.
“Munckikkunniit asfaltiliorfiup tigusinnaanera nuannaarutigeqaarput. Kommunimut iluanaarutaangaatsiarpoq, asfaltiliorfiup uagut pigisimasatsinniit pisinnaasai pitsaassusaalu annertunerungaatsiarmata. Tamanna isumaqarpoq, siunissami pitsaanerusumik aqqusinernik aserfallatsaaliisinnaalissasugut aqquserniorsinnaalerlutalu, tamanna innuttaasunut iluaqutaassaaq pitsaanerusumik attanneqarsinnaanerusunillu aqqusineqalernikkut. Asfaltiliorfiup kommunip attaveqaasersuutinik suliaqarnerani pingaaruteqalernissaa Nuummilu aqquserngit pitsaanerulersinnissaat qilanaaraarput.”
— Margrethe Rosing Hegelund, Attaveqaasersuutinut, Avatangiisinut Aalisarnermullu (Sanarfinermut Avatangiisinullu) Fagchefi, Kommuneqarfik Sermersooq.
2020-mili pingaarnertut mittarfiliortut asfaltiliorfimmik atuisuupput, taanna Munckimiit kommunimit tiguneqarpoq. Tamanna isumaqarpoq kommunip nammineq aqqusernganut atuisinnaaneq killeqarsimasoq. Peqatigitillugu Nuummi biilit amerlaneruleriartorneranni aqquserngit atorneqarnerulerput. Uuttuinerit takutippaat assersuutigalugu ullut tamaasa Sipisaq biilinit 19.000-it tikillugit amerlatigisunit aqqutigineqartartoq.