Kommuneqarfik Sermersooq Pride-mut atatillugu LGBTQIA+-ip erfalasuanik erfalasoqarpoq. Erfalasulerneq uagut kommunitut namminiussuseqarnissamut – aamma asarusutap asasinnaanissaanut pisinnaatitaaffeqarnermik tapersersuinitsinnut ersarissumik takussutaavoq.
Kommuneqarfik Sermersuumi assigiinngisitaarnerup nukittuffiunera akuersaarparput. Kommuniorusuppugut inissaqartitsisoq peqataatitsisorlu, innuttaasut tamarmik – qanorluunniit suiaassutsikkut kinaassuseqaraanni, kajungissuseqaraluaraanni imaluunniit inuunermi inissisimagaluaraanni – toqqissisimasutut ataqqineqartutullu misigiffigisaat.
“Neriusaamik erfalasoqarpugut kommunitsinni kikkut tamarmik tikilluaqqusaasutut misiginissaat pingaaruteqarmat. Politikkimut tunngassuteqanngilaq – inunnut tunngassuteqarpoq. Assigiinngitsuunermut pisinnaatitaaffik nakkutigaarput, aamma innuttaasut tamarmik ataatsimuussusitsinnut tunniussaqarnissamut atugarissaarnissamullu assigiimmik periarfissaqarnissaat sulissutigaarput,” borgmester Avaaraq Olsen oqarpoq.
Erfalasulerneq kommunip naligiissitaanermut aamma peqataatitsinermut politikkianut Assigiinngitsuunermut inissaqartitsinermut attuumassuteqarluinnarpoq, tassani aalajangerneqarpoq kinaluunniit suiaassutsikkut kinaassuseq, kajungissuseq, upperisaq, ukiut imaluunniit innarluuteqarneq pissutigalugu immikkoortitaassanngitsoq. Akerlianilli assigiinngitsuuneq nukissatut naleqartinneqassaaq, inuiaqatigiinni pisuujunerulersitsisoq ataqatigiinnerulersitsisorlu.
Erfalasoq kommunip allaffiata saavani amuneqassaaq, qaammat Pride tamakkerlugu takussaassalluni. Kommunip sociale mediaanni assit aamma allanngortinneqarumaarput, juunip 28-ianni neriusaarpaluttunngortinneqassallutik.