Marsip ulluisa sisamaanni 2025 Kommuneqarfik Sermersuumi Kommunalbestyrelsip suliffeqarneq pillugu immikkoortumut pilersaarut akuersissutigaa, ukiuni tallimani tulliuttuni suliffeqarneq pillugu iliuusissatigut aqqutissiuussisussaq.
Immikkoortumut pilersaarut atorlugu suliffeqarneq oqimaaqatigiissup pilersinneqarnissaa siunniunneqarpoq, kommunimi suliffeqarfinnilu namminersortunit pigineqartuni sulisussanik pisariaqartitsinerulerneq naammassiniarlugu. Immikkoortumut pilersaarummi kommunip suliffeqarnermut politikkia aallaavigineqarpoq, tassanilu sammisat sisamaassut tunngavigalugit suliarineqarluni: ilaatigut suliffeqarnermi inissaqartitsinissaq, inuusuttut suliffissaaleqisut aamma piginnaanngorsaaneq qitiutillugit.
Kommuneqarfik Sermersuumi innuttaasut amerlassutsimikkut katitigaanerat ukiuni aggersuni malunnaatilimmik allannguissaaq. Utoqqalinersiaqalersinnaasut amerliartornerisa ilutigisaannik, sulisinnaasut ikiliartussapput, kinguaariit tulliuttut suliffeqarnermiittut ikinnerunerat pissutigalugu. Sapinngisamik amerlasuut suliffeqarniassammata immikkoortumut pilersaarummi ataasiakkat sulinerminni pitsaanerusunik sinaakkuteqartinneqarnissaat ukkatarineqarpoq, aamma immikkut pisariaqartitsisut uagut akornatsinniittut eqqarsaatigalugit. Immikkoortumut pilersaarut tamanut sammisuuvoq allanik suleqateqarneq iliuuseqarnissallu ukkataralugit. Immikkoortumut pilersaarummi kommunip iliuusissatut pilersaarusiornera ataqatigiissarneqassaaq kommunimi suliffeqarnermut suliassaqarfik aammalu immikkoortortaqarfiit soorlu Inuussutissarsiornermut immikkoortortaq, Atuarfiit imaluunniit Sulisoqarnermut Kiffartuussivik.
“Marloriaammik unammilligassaqarpugut – sulisussanik pisariaqartitsineq annertusiartorlunilu innuttaasunik ataqatigiimmik aaqqissuussinerup iluani katataasoqartarpugut. Amerlavallaat ilinniakkamik suliffimmillu unitsitsiinnartarnerat saniatigullu suliffeqarfiit sulisunik amigaateqartarnerat isiginngitsuusaaginnarsinnaanngilarput. Taamaattumik immikkoortumut pilersaarut suliffeqarnermut politikkimut tunngaannanngilaq – aamma inunnut tunngavoq. Inuit piginnaasaannut aningaasaliigaangatta piginnaanngorsarnissamullu periarfissiigaangatta, taava inunnut ataasiakkaanut inuiaqatigiinnullu tamakkiisumik naleqartitanik pilersitsisarpugut.”, borgmesteri Avaaraq Olsen oqarpoq.
Suliassaqarfimmut pilersaarutikkut suliniutit aallartinneqareersut ilagaat Majoriami modulikkaartumik atuartitsinerup atuutilersinneqarnissaa. Nutaamik atuartitseriaaseq atuartut ataasiakkaat pisariaqartitaannik naammassinnilluarnerusinnaavoq modulikkaartunik arlalinnik immikkoortillugit atuartitsinermik aaqqissuussinikkut. Suliniut taanna ukiumi atuarfiusumi 2023/2024-mi Nuummi Majoriami misiligutitut saqqummiunneqarpoq taamanikkumiilli kommunimi Majoriaqarfinni pilersinneqarluni. Taamaattumik kommune tunisassiornermut atuarfittut assingusumik ingerlatsinissamik pilersitsivoq, Paamiuni “Pilersitsivik”. Pilersitsivik januaarimi ammarneqarpoq aammalu inuusuttut amerlanerit ilinniagaqalernissamik piareersimasut inuussutissarsiutinut ilinniartitaanerit arlaannik ilinniagaqalersinnissaannik siunniussaqarluni.
”Suliffissaaleqisut piginnaanngorsarniarlugit, pitsaanerusumik suliffeqalernissaannut immaqalu isertitaqarnerunissaannut ikiorsinnaavagut, peqatigitillugulu suliffeqarfiit, sulisussaaleqisut ikiorlugit”, borgmester Avaaraq Olsen oqarpoq.
Immikkoortumut pilersaarut peqataatitsinikkut suliarineqarpoq. Innuttaasunik ataatsimiititsisoqartarpoq aamma tamanut tusarniaaneq ingerlanneqarpoq kikkut tamarmik tusaaneqarnissaat qulakkeerumallugu.
Suliffeqarneq pillugu immikkoortumut pilersaarut tamakkiisoq linki una toorlugu atuaruk.