Nuuk nutaamik angusaqarfiuvoq: Kalaallit Nunaanni illoqarfiit pingaarnersaanni najugaqartut maannakkut 20.000-iupput. Tassuunakkut takuneqarsinnaavoq illoqarfik siuariartorfiullunilu allanngorarfiusoq – ineriartorneq tamanna illoqarfiit pingaarnersaat pillugu periusissiamut Nuuk2035-mut naapertuulluinnarpoq, tassani siunissaq piujuartitsiffiullunilu peqataatitsiffiusoq siunniunneqarmat.
Innuttaasut amerliartorluarnerat iliuuseqarfigisariaqarlunilu isumatusaarfiulluartariaqarpoq. Taamaattumik Kommuneqarfik Sermersuumi siunnerfilimmik illoqarfimmi piorsaasoqartariaqarpoq – inissialiornikkut, ulluunerani paaqqinnittarfiliornikkut, atuarfiliornikkut utoqqarnillu sullissiviliornikkut. Tamakku tamarmik pilersinneqassapput, illoqarfiup kikkunnit tamanit inuuffigiuminartuunissaa ukkataralugu.
”Soorunami amerliartornerput nuannaarutissaavoq, tamannali aamma piumasaqaatitaqarpoq. Meeqqat, utoqqaat innuttaasullu ajornartorsiutillit inissaqartinnissaat tapersersorneqarnissaallu qulakkiissavarput. Peqatigitillugu inuussutissarsiuteqartut takornarialerinermilu ingerlataqartut ineriartoqataaniassammata pitsaasunik atugassaqartillugit pilersitsiviussapput,” borgmester Avaaraq Olsen oqarpoq.
Illoqarfiup ineriartornerani timitaliinissaq isumatusaartumik aammalu innuttaasut qanimut suleqatigalugit ingerlanneqassaaq. Kinaassuseqarneq aammalu pinngortitami naleqartitat aallaqqaataaninngaanniit eqqarsaatigineqassapput, taamaalilluni nangittumik Nuuk Nuujuneranik misigiffiusinnaaqqullugu – aamma siunissami.
Mittarfiup allineqarneratigut takornariat amerlinissaat naatsorsuutigineqarpoq, taamaattumillu ukkatarineqarpoq takornariaqarnermi ineriartortitsinissami innuttaasunut naleqalersitsisumik ingerlanissaa illoqarfik pisariaqanngitsumik innarlinngikkaluarlugu.
Kisianni periusissiami illut atortulersuutillu kisimik pineqanngillat. Tassani pingaartinneqarpoq, kikkut tamarmik – tunuliaqutaat inuunerminnilu atugarisaat apeqqutaatinnagit – illoqarfimmi inooqataanissaminnut misigitinnissaat.
”Periusissiami anguniakkat pingaarnerit ilagaat, Nuuk illoqarfiussasoq kikkunnut tamanut inissaqartitsisoq – maani inunngorsimasunut, aammali maanga nuuttunut. Illoqarfik, ataatsimoornermik tassungalu atassuteqartutut misigineq qitiutillugit,” Avaaraq Olsen oqarpoq.
Periusissiaq tamakkerlugu uani atuarsinnaavat: Illoqarfiit pingaarnersaat pillugu periaasissaq 2035