Tasiilami eqqaanilu sumiiffinni arlalinni nuna sajuttoq sapaatit-akunnerata siuliata ingerlanerani nalunaarsorneqarpoq. Apriilip pingajuniit nunap sajunneri 40-t tungaanoortut uuttorneqarput – amerlanerpaalli annikitsuinnaammata malugineqarsinnaanatik.
”Innuttaasut arlallit uatsinnut saaffiginnipput – ilaat ernumapput, ilaalli apeqqutissaqaannarlutik – taamaammat GEUS attavigaara, taanna Tasiilami napparsimmaviup eqqaani uuttortaaveqarpoq,” Tunumi immikkoortortaqarfimmi pisortaq, Hjørdis Viberg oqarpoq.
Nuna annikitsuinnarmik sajussimasoq, GEUS paasissutissiivoq. Sajunnerit marluk sakkortunerusut piffissani ukunani pipput: apriilip tallimaani sumiiffimmi nal. 23:57 nunap sajunnera 2,3-usoq, aamma apriilip arfineq-pingajuani sumiiffimmi nal. 8:45 Richterip nunap sajunneranik uuttuutaa naapertorlugu 2,4-raavoq.
”Apriilip tallimaani nunap sajunnera napparsimmaviup eqqaani uttortavimmiit 4 kilometeriinnarmik ungasitsigisumi pivoq, taamaattumillu malunnarnerpaasimalluni,” immikkoortortaqarfimmi pisortaq nassuiaavoq.
Aarlerinartoqannginnera taassuma erseqqissaatigaa. Nunap taama annikitsumik sajuttarnera nalinginnaasuuvoq, sumiiffimmilu pisut GEUS-imi immikkut ilisimasalinnit malinnaaffigineqarput.