Inuit Ataqatigiit aamma Demokraatit kommunalbestyrelsimi suleqatigiilerput. Suleqatigiinnit Avaaraq Olsen Inuit Ataqatigiinnersoq borgmesteritut toqqarneqarpoq, Poul Pedersenilu Demokraatineersoq borgmesterip tullia siullertut toqqarneqarluni. Uani Suleqatigiinnissamik isumaqatigiissut atuaruk.
Arfininngorneq apriilip ulluisa tallimaanni, kommunimut qinersinermit ullut sisamat ingerlareersullu kommunimi partiit akornanni isumaqatiginninniarnerit naammassineqarput. Inuit Ataqatigiit, arfineq marlunnik ilaasortaatitaqartut, Demokraatiillu, sisamanik ilaasortaatitaqartut, suleqatigiilerput. Kommunalbestyrelsimi 19-inik ilaasortalimmi katillutik 11-nik ilaasortaatitaqarnikkut amerlanerussuteqarnissaq qulakkeerpaat.
Avaaraq Olsen Inuit Ataqatigiinneersoq borgmesteritut toqqarneqarpoq, taamaalillunilu borgmesteritut ingerlaqqissalluni. Poul Pedersen Demokraatineersoq borgmesterip tullia siullertut toqqarneqarpoq.
Borgmesteri Avaaraq Olsen oqarpoq: ”Kommunalbestyrelsimi pitsaasumik sulinitta ingerlateqqiinnarnissaanut periarfissaqarnerput nuannaarutigeqaara. Demokraatinik suleqatigiinnissamik isumaqatigiissutitsinni inuiaqatigiinni suliassaqarfinni qitiusut ukiuni aggersuni pitsanngorsarneqartussat ukkanneqarput. Pingaartumik meeqqat inuusuttullu qitiutinneqarput, tassani atugarissaarneq, paaqqutarinninnermi neqeroorutit aamma pitsaaliuinermi suliniutit annertuumik pingaarnerutinneqassallutik. Peqatigitillugu utoqqarnut aamma inunnut innarluutilinnut atugassarititaasut pitsanngorsarneqarnissaat pingaartippagut, pitsaanerusumik tapersersorneqarnissaannik aamma ulluinnaasa naleqarluartuunissaannik qulakkeerinninnissaq siunertaralugu.
Isumaqatigiissummi aamma ilinniartitaaneq qitiutinneqarpoq. Tassani meeqqat atuarfii pitsanngorsarneqassapput aamma inuussutissarsiornermik ingerlatsisunik suleqatiginninneq pilersinneqassaaq taamaasillutik inuusuttut amerlanerusut ilinniarfinnut atorfinnullu naleqquttunut amerlanerusunik periarfissinneqassapput.
Borgmesterip tullia Poul Petersen ilanngussivoq: “Inissiaqarneq aamma ukkapparput, inissiat amerlanerusut aamma siunissamut ungasinnerusumut akisussaassuseqarnerusumillu illoqarfinnik nunaqarfinnillu ineriartortitsinermi pilersaarusiornissaq pisariaqartinneqarmata. Suleqatigiinni aamma avatangiisinik mingutsitsinnginnissamik siunertarineqartoq erseqqippoq, aamma silap pissusia, avatangiiseq aamma pitsaanerusumik eqqagassalerineq ukkataralugu piujuartitsilluni ineriartortitsineq kissaatigineqarpoq, soorlu aamma inuussutissarsiorneq ineriartortinneqarnissaa pingaarnersiorneqassalluni.
Naggataagullu akisussaaffilimmik aningaasaqarnermik aqutsineq aamma pitsaanerusumik sullissineq isumaqatigiissummi sammineqarput, taakkua erseqqissuunerunermut aamma innuttaasunik pitsaanerusumik sullissinermullu iluaqutaassapput.
Uani suleqatigiinnissamik isumaqatigiissut atuarsinnaavat
Kommuneqarfik Sermersuumi kommunalbestyrelsimut ilaasortat 19-it nutaat apriilip ulluisa 30-anni Nuummi Kommuneqarfiup Allaffiani ataatsimeeqqaassapput. Ataatsimiinnermi ilaatigut politikkerit kikkut ataatsimiititani ataavartuni ilaasortaassanersut aalajangerneqassapput. Ataatsimiititani ataavartuni kikkut siulittaasunngussanersut ataatsimiititat ataasiakkaat inissitsiterlutik ataatsimiinnerini aalajangiunneqassaaq.
Apriilip ulluisa 30-anni kommunalbestyrelsip inissitsiterluni ataatsimiinnerani Kommuneqarfik Sermersuup Facebookkikkut qupperneratigut malinnaasinnaavutit imaluunniit oqaatsit tusaarusutatit malillugit ataatsimiinneq malinnaavigisinnaavat uani: