Visit Nuuk aamma Nuummi Najukkami Ataatsimiititaliamit qulakkeerneqarpoq Nuup eqqaani sheltersinut oqquisarfinnillu 12-inut nutaanik sanaartortoqarnissaanut tamakkiisumik aningaasaliissutissat. Sanaartukkat ineriartortinneqarput najukkami innuttaasut, peqatigiiffiit aamma ingerlatsiviit qanimut suleqatigalugit, aamma amerlanerit pinngortitaliartarnissaannut taakku tapersersuutaassapput.
Ukiuni aggersuni Nuup eqqaani pinngortitami ikorfartuutinik taasat 12-it nutaat mikisut akunnattumillu angissusillit sanaartorneqassapput. Pinngortitami ikorfartuutit tassaapput sheltersit oqquisarfiillu, taakkunani oqquisoqarsinnaavoq oqquartamiittoqarsinnaallunilu qanimut pinngortitamik misigisaqaatigaluni. Pinngortitami ikorfartuutit ilaat illoqarfimmut qanittumi inissinneqassapput, taamaalilluni ilaqutariinnit ajornanngitsumik atorneqarsinnaallutik. Allat kangerluup ilorpasinnerusortaani imaluunniit Nuup Akiani inissinneqassapput, inunnit asimiinnermik sungiussisimanerusunit atorneqarsinnaaqqullugit. Taakkua ilaat inunnut eqimattanut inissaqassapput allat inunnut ikittuinnarnut inissaqassallutik. Pinngortitami ikorfartuutit inuit amerlanerit pinngortitamiinnissaannut annermik kajumilersitsissapput piffissamillu pinngortitamiissinnaanermik sivitsueqataassallutik.
Najukkami atorluaaneq tunngaviussaaq
Nuummi Najukkami Ataatsimiititaliaq aamma Visit Nuuk suleqatigiillutik suliniummut tunuliaqutaapput. Danmarkimi aningaasaateqarfik Lokale og Anlægsfonden suliniutip aallartinneranit ineriartortitsinermi siunnersortitut qitiusumik atuuffeqartutut ilanngusseqataavoq, aamma maanna Nordea-fonden peqatigalugu suliniutip aningaasalersorneqarneranik qulakkeerinneqataavoq. Suliniut aallartisarneqarpoq Nuummi Najukkami Ataatsimiititaliamit kissaatigineqarmat asiarsimaarnissamut pitsaanerusumik periarfissaqarnissaq.
”Inuit amerlanerit pinngortitaliartarnissaat Nuummi Najukkami Ataatsimiititaliamit assut tapersersorusupparput, nalunnginnatsigu pinngortitamiinneq timimut tarnimullu peqqinnartuusoq. Taamaattumik suliniut maanna piviusunngortinneqarsinnaammat assut nuannaarutigaarput. Lokal og Anlægsfonden-imik suleqateqarneq suliniummik kivitseqataavoq. Suliniutinit assingusunit misilittakkaminnik tapersiipput maanilu uagut pinngortitamik qanoq atueriaaseqarnitsinnik alapernaallutik” Finn Meinel, Nuummi Najukkami Ataatsimiititaliamit oqarpoq.
Suleqatigiinnit suliniummut tunuliaqutaasunit najukkami peqataatitsinissaq pingaartinneqaqaaq. Suleqatigiit suliniummut tunuliaqutaasut inissiivissanik naleqquttunik misissuillutik pisuttuaqatigiittarput kiisalu workshoppinik innuttaasunillu ataatsimiisitsinernik ingerlatsisarlutik, innuttaasut suliniummik iluaquteqartut amerlanerpaajunissaat qulakkeerniarlugu. Sisorartartut peqatigiiffii, isorartuumik pisuttuartartut, qajartortartut, timmiarsiuut, qamuteralattartut, suliniaqatigiiffik ”Gå væk kræft – livet er en gave (Kræfti peerit – inuuneq tunissutaavoq)”, spejderit, ulluunerani paaqqinnittarfiit, atuarfinni aqutsisut aamma takornarialerinermik ingerlatsiviit tamakkuupput suliniummut ingerlaavartumik tunniussaqaqataasut.
”Uagutsinnut pingaaruteqarpoq innuttaasut kissaataat pisariaqartitaallu aallaaviginissaat, aamma atuisoqatigiit assigiinngitsut tunngavigalugit amerlanerpaat anguniarlugit eqqarsarnissarput pingaartipparput. Suliniutip takornarialerinermut aamma iluaqutaanera marloriaammik iluanaarneruvoq, assersuutissatsialaallunilu takornarialerinermik ineriartortitsineq najukkami inuiaqatigiinnut pitsaanerusumik pilersitseqataasinnaaneranut,” Sara Nissen, Visit Nuummi ornitassamut aaqqissuussisoq oqarpoq.
Illussanik titartaasarfik Biotope, sanaartugassanik mikisunik 12-inik titartaasuuvoq. Biotopemit atorluarneqarput issittumi illuaqqanik mikisunik ajornanngitsumik pilersinneqarsinnaasunit misilittagarpassuit, aamma suliami matumani Nuummi-iluseq atorneqartoq immikkuullarissoq ineriartortippaat, ilisarnartoq aammali pinngortitap ilusaanut naleqqussagaq. Taamaaliorsinnaajumallutik ilaatigut Kittani sulisut peqatigalugit kalaallisuut ilusaasa issusiannik itisiliipput, qaqqarsuup Sermitsiap ilisarnassusia misissorlugu toqqillu qanganitsat isumassarsiorfigalugit.
Aningaasaliineq aamma sanaartukkanik atugaqarneq
Najukkami aamma aningaasaateqarfinnit ajunngisaarfigineqarluarneq tunngavigalugit maanna aningaasaliissutissat katinnerat tamakkiisoq inissinneqarpoq. Nuummi Najukkami Ataatsimiititaliaq 500.000 kr.-inik aamma Kommuneqarfik Sermersooq 5 mio kr.-inik tapiissuteqarput. Danmarkimi aningaasaateqarfiit marluk Nordea-fonden aamma Lokale & Anlægsfonden tamarmik tapiissuteqarput aappaa 6 mio kr.-inik aappaalu 5.2 mio kr.-inik.
”Aningaasalersuinissap inissinneqarnerata iluatsinnera assorsuaq nuannerpoq. Inuit taama amerlatigisut akuutillugit peqataatinneri, taakkualu peqataanerminni piffissamik nukissanillu atuinerat eqqarsaatigalugu, nuanneqaaq isumassarsiat taamak pilertortigisumik piviusunngortinneqarsinnaanerat takullugu. Qularinngilara, suliniut manna aqqutigalugu pinngortitamiinnissamut ataatsimoorluta kivitseqatigiissasugut, inunnut pinngortitamiinnermik sungiusimasaqanngitsunut aamma misilittagaqarluartunut, kiisalu inuit amerlanerit pinngortitami qanoq pissuseqarnissamut ilinniarusuttunut pitsaasunik sinaakkusiisinnaagatta”, borgmester Avaaraq Olsen oqarpoq.
Nordea-fondenimit taperneqarneq qulakkeerinneqataavoq, suliniutip sanaartukkatigut sinaakkutissanik taamaallaat inerneqannginneranut. Sanaartukkat piviusunngortinneqarnerannut tapiissuteqarnerup saniatigut Nordea-fondenimit aamma suliniutip ilaanut tapiissuteqarnissaq toqqarneqarpoq, matumani pineqarpoq sanaartukkat “uummassusilerneqarnerat”. Sanaartugaq ataaseq atuartitsinermut atortunik kiisalu atuaqatigiinnut aamma ulluunerani paaqqinnittarfinnut atuartitsinermik ineriartortitsinermik aallaavilimmik pilersorneqassaaq, pinngortitami ilikkagassanik immikkut ukkataqartunik, sanaartugarlu alla qaannanik sungiusaatinik anguartuutinillu (padleboards) atortulersorneqassaaq.
Sanaartukkanik atugaqalernermut atasumik Nordea-fondenimit tapiissutit atorlugit peqatigiiffiillu suleqatigalugit pikialaartitsinernik aaqqissuussinerit aamma periarfissaassapput, sanaartukkat siunissami qanoq atorneqartarnissaannut ilitsersuinernik tapertaasumik. Lokal og Anlægsfonden eqqarsaatigalugu, suliniut Kalaallit Nunaanni suliniutinut assingusunut amerlanerusunut assersuutitut atuutissaaq, soorluttaaq aningaasaateqarfimmit naatsorsuutigineqartoq, suliniut Danmarkimi suliniutinut nutaanut isumassarsiorfittut atorneqarsinnaassasoq.
Sulinerup ingerlateqqinnera
Suliniut 2025-mi upernaakkut neqerooruteqartitsinermik ingerlatsiffigineqassaaq, aamma ukiut tulliuttut 3-4 piviusunngortinneqarluni workshopsit, tusarniaanerit aamma pikialaartitsinerit aqqutigalugit, taamaaliornikkut najukkamit peqataatitsineq qulakkeerneqaqqullugu.
——————————
Attavissaq:
Kommuneqarfik Sermersooq: Mads-Daniel Skifte, Inuussutissarsiornermi pisortaq oqa. +299 55 82 78
Lokal & Anlægsfonden: Kir Klysner, tusagassiivinnut attaveqaat, oqa. +45 31 18 71 43
Nordea: Signe Balling, tusagassiivinnut attaveqaat, oqa. +45 40 70 37 79
Assiliartaliussat
- Ukkusissaq qaavani Kangerluarsunnguup tungaanut illuaraliassatut siunnersuut
- Eqimattat ”Gå væk kræft – Livet er en gave (kræfti peerit – inuuneq tunissutaavoq)” Quassussuup qaavani oqaloqatigineqarnerat
- Innuttaasunik ammasumik ataatsimiisitsineq, peqataasunit inissiiffissat pisariaqartinneqartullu oqaluuserineqarput
Assit assiliartaliussallu tamarmik illussanik titartaasarfimmit Biotope suliarineqarput
