Marsip arfineq-pingajuanni Nunarsuaq tamakkerlugu arnat ulluannut tunngatillugu naligiissitaaneq aamma arnat inuiaqatigiinni inissisimanerat Kommuneqarfik Sermersuumi immikkut ukkatarineqassapput. Tamanna erseqqinnerutinniarlugu kommunep quppernerisa ilaanni kommunep ilisarnaataa tungujortuusoq aappilarujuttunngortillugu allanngortinneqassaaq, naligiissitaanerlu pillugu oqariartuutit inoqatinut attaveqaatitigut siammartissavagut.
Arnat atuuffinni aqutsisunilu tamani
“Kommuneqarfik Sermersuumi suliassaqarfinni atuuffinnilu tamani arnartaqarpugut. Aqutsisorpassuatta arnaaneri immikkut tulluusimaarutigaarput – taanna ineriartorneq suli tamani atuutilinngilaq.
Assigiinngisitsisarnerup akiornissaa Kommuneqarfik Sermersuumi aamma pingaartitaraarput, inuttullu immikkuullarissutigut assigiinngitsut inissaqartillugit. Naligiissitaanermut aamma peqataatitsinermut politikkerput, Assigiinngisitaarnermik inissaqartitsineq, maanna atuutileqqammerpoq, taanna suiaassutsit akornanni naligiissitsinermut tunngaannanngilaq, aammali ukiut, immikkut inuiaassuseq, innarluuteqarneq, upperisaq aamma allat kinaassutsimut tunngasut pillugit assigiinngisitsisoqannginnissaa anguniarparput,” borgmester Avaaraq Olsen oqarpoq.
Naligiissitaaneq ullut tamaasa anguniarneqartoq
Naligiissitaaneq ullut tamaasa anguniarneqartassaaq, arnalli marsip arfineq-pingajuanni immikkut nersualaarneruniarpagut, inuiaqatigiinnilu naligiissitaanerunissap suli anguniarneqarnissaa ukkataralugu.
Arnanik ulloq taanna immikkut malunnartitsineq nunatsinniinnaq pissanngilaq, arnalli pisinnaatitaffimminnik periarfissaminnillu suli sorsuuteqartut nunarsuaq tamaakkerlugu nersorniarneqassapput.
Kikkut tamarmik oqaloqatigiinnermut peqataanissaannut ullormillu malunnartitseqataanissaannut kajumissaarpagut.
Tamassi ullorsiorluarisi!