Ittoqqortoormiini aamma nunaqarfinni Isortumi, Kulusumi, Kuummiuni, Sermiligaami aamma Tiilerilaami ammaannartumi ikuallaanissamut Kommuneqarfik Sermersooq akuersissuteqarpoq.
Borgmesteri Avaaraq Olsenip upalungaarsimasut qanimut oqaloqatigai, allallu susassaqartut peqatigalugit akuersissuteqarnermi piumasaqaaterpassuarnik misissuilluarluni qulakkeerinnittoqarpoq.
“Tunumi ammaannartumi ikuallaanissamut akuersissuteqarnerput pisarialik maanna nalunaarutigisinnaagatsigu nuannaarutigaarput. Kommunetsinni alloriarneq pingaaruteqarpoq, iliuusissallu piareersaleruttorpavut – piumasaqaaterpaaluillu suli itisiligassagut erseqqissagassagullu aamma eqqumaffigaagut,” borgmesteri Avaaraq Olsen oqarpoq.
Piumasaqaatinik misissuinermi Sanarfinermut Avatangiisinullu Ingerlatsivik aamma Upalungaarsimasut suleqatigilluarneqarput, ikuallaanerullu toqqissisimanartuunissaa qulakkeerniarlugu sillimaniarnermut tunngasut tamarmik nalilersorluarneqarput. Qaqugorpiaq ikuallaasoqarnissaa suli ullulerneqanngilaq, tassani piumasaqaatit suli erseqqissarneqarnerat pissutaavoq.
Suliap killiffia pillugu Kommuneqarfik Sermersooq innuttaasunut paasissutissiisassaaq, aaqqitassallu kingulliit inissereerpata paasissutissat amerlanerusut nalunaarutigineqarumaarput.