Siammarterineq pillugu Kommunalbestyrelsip pilersaarutaa ingerlanneqaleruttorpoq. Massakkut Ittoqqortoormiini illoqarfiup aqutsisuanik aamma Ittoqqortoormiini, Tasiilami Paamiunilu ingerlatsinermi pisortanik, sumiiffinni nunap immikkoortuani pisortap suliaanik ikorfartuisussanik, atorfinitsitsisoqarpoq.
Kommuneqarfik Sermersuup siammarterinerani pingaarutillit ilaattut Tasiilami aamma Paamiuni immikkoortumi pisortaasimasut annerusumik akisussaaffilerneqarput, atorfiilu nunap immikkoortuani pisortatut allanngortinneqarlutik.
Suliaq taanna suli ikorfartorniarlugu massakkut nunap immikkoortuini arlariinni ingerlatsinermi pisortanik atorfinitsitsisoqarpoq. Justus Hansen Tasiilami aamma Ittoqqortoormiini kiisalu Jan Jørgensen Paamini. Taakkua saniatigut Charlotte Pike Ittoqqortoormiini illoqarfimmi ingerlatsisutut atorfinitsinneqarpoq.
Ingerlatsinermi pisortat najukkami sukkanerusumik iliuuseqarsinnaapput – assersuutigalugu ingerlatsinerup aserfallatsaaliuinermullu tunngasunik namminneq iliuuseqarsinnaapput – aqutsineq pisariinnerulersillugulu suliap suliarineqarnera pitsaanerulersillugu.
Borgmesterip Avaaraq Olsenip taamatut najukkami ataqatigiissaarisinnaaneq aamma Ingerlatsiviit Nuup avataani annerusumik akisussaaffilerneqarnerunissaat nuannaarutigivaa: “Siammarterineq politikkikkut piffissami sivisuumi ukkatarineqarpoq, nuannaarutigivaralu anguniagarput massakkut piviusunngortinneqassammat. Ingerlatsinermik pisortat nutaat sumiiffinni Tasiilami, Ittoqqortoormiini aamma Paamiuni sumiiffinni nukissaqarnerulersitsissapput, taamaalillunilu Nuup avataani akisussaaffeqarnerulernissaq alloriarneq pingaarutilik tiguneqassaaq.”
Tasiilaq (aamma Ittoqqortoormiit)
Nunap immikkoortuani pisortaq: Hjørdis Viberg
Ingerlatsinermi pisortaq nutaaq: Justus Hansen
Justus ukiorpassuanngortuni Kommuneqarfik Sermersuumi sumiiffimmi qinikkatut misilittagaqarpoq, tassani ilaatigut Tasiilaq kommunimilu tunup sineriaata sinneranut sinniisuulluni kiisalu qinigaaffinni arlalinni sanarfinermut ataatsimiititami issiasarpoq. Ukiuni kingullerni marlussunni kommunimi inuussutissarsiornermut immikkoortoqarfiani siunnersortiusimavoq, aamma Tasiilaq Ittoqqortoormiillu qitiutillugit. Ingerlatsinermi pisortatut maanna Justus allaffissornermi aamma politikkikkut misilittagaqarluanini atorluarsinnaalissavaa, najukkamut eqqarsaatit iliuusinngortinneqarnissaat pillugit.
Ittoqqortoormiit
Illoqarfimmik ingerlatsisoq nutaaq: Charlotte Pike
Charlotte politikkeritut ukiuni arlalinni Ittoqqortoormiinut sinniisuusarpoq, piffissamilu sivisunerusumi illoqarfimmi kommunip sulisuisa ilaattut ingerlatitsisooqataavoq. Illoqarfimmik ingerlatsisutut nutaatut Charlotte piginnaatinneqarpoq najukkami pisut qaffatsinneqarnissaannut aamma illoqarfimmi nammineq aalajangiisinnaanermut sinniisuunissamut.
Paamiut
Nunap immikkoortuani pisortaq: Heidi Jeremiassen
Ingerlatsinermi pisortaq nutaaq: Jan Jørgensen
Jan Paamiuni ilisarisimaneqartuuvoq illoqarfiullu aalisakkeriviani pisortatut atorfimmeersuuvoq. Illoqarfimmi inuussutissarsiuteqartunik ilisimasaqarluartuuvoq ukiorpassuarnilu kommunimik suleqateqarpoq, taamaalilluni Jan sakkussaqarluarluni Kommuneqarfik Sermersuumi atorfittaamini atorfinissaaq. Ingerlatsinermi pisortatut Janip misilittakkaminik nunap immikkoortuani pisortamut siammarterinerup ingerlanneqarnerani ikorfartuisinnaanerminik periarfissaqalissaaq.
Suleriutsit sukkanerusut akuutitsinerusullu
Borgmesteri Avaaraq Olsen naggasiivoq: “Innuttaasut pitsaanerpaamik sullinneqarnissaat Kommunalbestyrelsimit qulakkeerneqarusuppoq, aamma aalajangiinerit pineqartut qanittuanni aalajangerneqartarnissaat pillugu. Ingerlatsinermi pisortanik marlunnik aamma illoqarfimmik ingerlatsisumik nunap immikkoortuinik ilisimasaqarluartunik atorfinitsitsinikkut, pingaartumik ingerlatsinerup aserfallatsaaliuinerullu iluani suliassat najukkami aqutsisunut nuunneqassapput, taamaalilluni aalajangiisarnerit sukkanerulissapput aamma najukkami innuttaasut akuutinneqarnerulissapput.”