Tasiilami meeqqat inuusuttuaqqallu pinnguartarfittaarnissamut qilanaarsinnaalerput, Folketingimi Grønlandsudvalg Tasiilamut tikeraareernerisa kingorna suliniummut aningaasaaliissallutik aalajangermata. Aneerasaartarfimmi pinnguarneq, aalaneq ataatsimoornerlu pingaartinnerullugit sammisassaqartitsiviussaaq, illoqarfiup meerartai inuusuttuarartaallu imminut imminnullu unammillersinnaassallutik.
“Illoqarfiup qeqqani pinnguartarfiliortoqassaaq, Klubbip Katersortarfiullu eqqaaniissaaq, nunaminertarlu sukisaarsaartarfittut atugassiissutigineqareersoq taamaalilluni assigiinngitsunik issiavilersorneqassaaq, taakkulu illoqarfimmi innuttaasut saneqqukkaangamik qasuersaarusukkaangamillu angajoqqaalluunniit aanaakkullu aneerasaartarfimmiittunit atorneqarsinnaassapput,” Nunap immikkoortortaani pisortaq Hjørdis Viberg oqarpoq.
Pilerinarluinnartut ilagaat pannabane – arsaattarfeeraq arlalinnik teqeqqulik, tassanilu arsamik ilioriaatsinik periaatsinillu sungiusartoqarsinnaassaaq, pinnguaatillu aammalu timimik aalatitseriaatsit nutaat aalassarissutimut ataatsimoornernullu nukittorsaataasinnaasut misilerarneqarsinnaassallutik.
“Upernaamut “pinnguartarfik aalanissamut atorneqarsinnaasoq” umiarsuarmut siullermut tikiunneqassaaq, kinguninnguanilu ikkussuunneqassalluni. Illoqarfiup inuusuttortai suliamut peqataatinnissaat pilersaarutaavortaaq,” Hjørdis Viberg oqarpoq.
Suliniut illoqarfimmi meeqqat inuusuttullu ilorrisimaarnerannut aammalu timimik aalatitsilluarnissamut periarfissarissaarnissaannut sinaakkutinik pitsaasunik ukkassinermut ilaavoq. Kommuneqarfik Sermersuumit 2030-mi Kalaallit Nunaat nunarsuarmi aalanerpaaffiusussatut takorloorneqarnera tapersersorneqarpoq, Tasiilamilu sammisassaqartitsivimmik taassuminnga pilersitsineq takorluukkamik taassuminnga piviusunngortikkiartuaarneranut ilaavoq.
Kommuneqarfiup Tasiilami playmakerimik pilersaarummik GAME-imik suleqateqarneratigut illoqarfimmi timersornermik kulturilerinermillu suliaqarnerunissaanut kingorna aamma suliaqarnissaanut periarfissiisoqassaaq.