Tusagassiortut nunanit allaneersullu sunniiniarlutik Nunatsinni meeqqanik ujartuillutik politikki pillugu isumaannik apeqqarissaarniarnerat Kommunalbestyrelsimit tamarmiusumit akuersaarneqanngilluinnarpoq.
Tassa Amerikami præsidentinngortussap Nunatsinnik soqutiginninnera pissutigalugu tusagassiortunit sunniiniartunillu Kalaallit Nunaat aatsaat taama sammineqartigaaq. Amerlanerit maligassiuerpalaartumik pissusilersorput, taamaattorli amerlanngitsut nuannerpallaanngitsumik pissusilersornerat Kalaallit Nunaanni tusagassiortuinit maluginiarneqarsimavoq.
Inuit taakku ilaatigut meeqqat inuusuttullu aqqusinermi unissarlugit apersorusussimavaat. Nutaarsiassatigut internetikkullu attaveqatigiittarfinni nunarsuaq tamakkerlugu siammartigassanik filmiliummik immiullugit, meeqqap angajoqqaavi akuersiseqqaanngiivillugit.
Kommuneqarfik Sermersuumi Kommunalbestyrelse periutsimut taamatut ittumut akuersaanngilluinnarpoq, piumaffigalugillu meeqqanik ujartuiunnaaqqullugit.
“Nunani taakku aggerfianni tusagassiutitigut ileqquusartut naluara allaanerujussuunersut, maanili Kalaallit Nunaanni meerartavut taamatut nittarsaanneq ajorpavut. Angajoqqaavi akuersiseqqaarlugit aatsaat filmiliarisussaavaat,” borgmesteri Avaaraq Olsen oqarpoq.
Nangilluni oqarpoq: “Allaammi assersuutissaqarpoq, sunniiniat amerikameersut meeqqanut aningaasanik hundrede dollarerpassuarnik tunniussinerminni filmiliorsimasut. Qularnanngitsumik internetikkut attaveqatigiittarfinni malugeqquinnarlutik imaluunniit kikkut tamat oqallisigisaat aalajangersimasumut saatinniaannarlugu. Taamaaliorneq ileqqussatigut akuersaarneqarsinnaanngilluinnarpoq.”
Taamatullu Nuummi atuarfiit meeqqeriviillu tusagassiortunik meeqqerivimmik imaluunniit angajoqqaanik isumaqatigiissuteqaqqaaratik meeqqanik apersuiartorlutik takkussimagaluartunik arlalinnik itigartitsisimapput. Tusagassiortut atuarfimmi sulisunit eqqumaffiginnittunit tamatigut erngertumik itigartinneqartarsimapput.
Borgmesteri Avaaraq Olsen itisiliilluni oqarpoq: “Tusagassiortut sunniiniallu taakku tusagassiornermi imassaqartitsiniaannarlutik periuserisaat akuerineqarsinnaanngilluinnarput. Meeqqat angajoqqaavi akuersitinneqarsimanngippata apersorneqartussaanngillat. Meeqqat aamma aningaasarpassuarnik akilerlugit amerikamiut tusagassiutitigut ilisimaneqarluartut pillugit tusaruminartumik oqalutsinniarneqassanngillat. Taamatuttaaq pitsaasuunngilaq, nunanut tamalaanut tusagassiortut sinnerlugit tusagassiortut isumaqatigiissuteqaqqaaratik takkutiinnartut, sammineqartoq assigisaaluunniit pillugu meeqqanik apersuinissamik naatsorsuuteqarlutik, meeqqat atuartinneqartut akornusersorlugit.”
Kommunalbestyrelsimit angajoqqaanut tamanut kaammattuutigineqarpoq, meeqqat tusagassiortumit sunniiniartunilluunniit attavigineqassagaluarunik qanoq iliornissaat pillugu meeqqatik oqaloqatigissagaat. Assersuutigalugu kingunerisinnaasai suunersut kiisalu peqataanissamut itigartitsiinnarsinnaasut.
Kommunalbestyrelse tamarmiusoq tusagassiortunut sunniiniartunullu maaniinnerminni ataqqinnittumik pissusilersortunut qutsaviginningaarpoq. Akerlianillu Kommunalbestyrelse Kalaallit Nunaanni naleqartitanut suusupaginnittunut kiisalu namminermut iluaqutissaq piinnarlugu meerartatsinnik inuusuttatsinnillu sutigut arlaatigut atornerluiniarsarisunut akuersaanngilluinnarpoq.