Januarip arfernganni Timersortartut Ulluat ingerlanneqartarpoq, Nuummi Timersortartut Ulluat ukioq manna aamma Inussivimmi ingerlanneqarpoq. Timersortartorpassuit tapersersuisullu Inussivimmi najuupput, timersortartut taakkulu peqatigiiffii ukiup ingerlanerani takutitsilluarsimasoq nersornaaserneqarmata.
Timersortartut Ulluanni nersornaasiinerit kommunip illoqarfiini tamani ingerlanneqarpoq, Nuummilu nersornaasiinerit Inussivimmi pipput. Ulloq saqqummiisumit Marie Motzfeldtimit aqutsisuuffigineqartoq borgmesteri Avaaraq Olsenimit ammarneqarpoq.
Nuummi timersortartut timersoqatigiillu nersornaaserneqarneranni innuttaasut 1000-iniit ikinnerunngitsut peqataapput. Nersornaasiinerit ajugaanernut takutitsilluarsimanernullu tunngaannanngillat kisialli sungiusarluarsimanerannut tunniusimalluarnerannullu aamma nersorinninneruvoq.
Timersortartut ulluanni toqqarneqartut, nersornaaserneqarneranullu tunngavilersuutit:
Timersullammak: Minik Møller Platou – Minik Møller Platou eqqillit timersuutaanni Dene Gamesimi ukiut arlallit angusarissaartuartarpoq issittormiut unammiuaarneranni. Arctic Winter Gamesimi 2023-mi aamma 2024-mi unammeriaatsimi Stick pullimi pissartaavoq unammeriaatsillu arlallit aamma angusarissaarfigalugit. Taamatuttaaq nuna tamakkerlugu unammersuarnermi angusarissaartuartuuvoq.
Ukiup Iligiivi: B-67 badminton – Angutini arnanilu inersimasuni B-67-ip perortitai 2024-mi pissartanngorput ukiukinnerillu angusarissaarluarlutik. Nunatta avataani unamminerni inuusuttuaqqat angajulliit B-67-meersut Arctic Winter Gamesimi ujamippassuarnik angerlaassipput. Taamatuttaaq inersimasuni nunanut allanut unammisartuni unammisartut pingaarutillit arlallit tassaapput B-67-miit aallaaveqartut. Ataatsimut isigalugu B-67 sulorarnermi Nunatsinni Nunattalu avataani malunnaatilimmik angusarissaartitsivoq nammineq piumassutsimik suliniartut tunngavisseeqataanerisigut.
Sungiusaallammak: Louis Nielsen – Nuummi taekwondortartut ukiut kingulliit ukioqqortussutsinni tamaginni angusarissaartarnerannut tunulequtsiilluartut ilagaat sungiusaasoq Louis Nielsen. Timersornikkut inoqatinullu ataqqinnittumik inuttut siuariaateqarnissaq qitiutillugu sungiusarneq ingerlajuarpoq. Angusat pitsaalluinnartut maniguuttumik pissuseqarnikkut taekwondortartut maligassiuilluarnissaat aqqutissiuuttarpaa.
Aqutsisuullammak: Peri Fleischer – Peri Fleischer qasusuilluni suliuarpoq meerarpassuit, inuusuttuaqqat inersimasullu peqqinnartumik sammisassaqarnissaat qulakkeerinneqataaffigalugu. Nunatsinniinnaanngitsoq aammali Nunatta avataani meeqqat timersornertik aqqutigalugu nuannersunik misigisaqarsinnaaqqullugit aningaasanik katersuiniarnermi periarfissanillu ujartuinermi siulersuisoqatiminut angajoqqaanullu suleqataasunut Peri aqutsisuulluarpoq.
(Peri Fleischer najuussinnaannginnami peqataanngilaq)
Piukkunnaatilik: Lars Muumu Jerimiassen – Lars Muumu Jeremiassen, Nunatsinni Unammersuarnermi (NU) inuusuttuni angusarinnerpaavoq, kiisalu inuusuttuni nunatsinni Alaskan High Kickimut rekordiliilluni 2 meter 18 cm tukeramiuk. Kiisalu AWG 2024 Alaskami ingerlanneqartumi aamma inuusuttuni Alaskan High Kickimi rekordilioqataalluni 2meter 24 cm tukeramiuk, saniatigullu AWG-mi pointeqarnerpaalluni pissartanngorpoq.
Kajumissaat: Miiti Geisler – Ullaaralannguaq Nuussup mannguatigut arpaffissiat ujaraaqqanik qallikkat aqqutigalugit arpattoq takussaajuartoq tassaavoq Miiti Geisler. Apigaangallu illerngit atuarlugit suli arpattuartarluni. Aasarisseruttornerani Nuummiit Kapisilinnut arpalluni pisullunilu unammilluni misigisassarsiortuni Miiti Geisler peqataajuartarpoq aqqut imaannaanngitsoq aqqutigereerlugu nukissaqarluarpasilluni apuuttarluni. Miitip takutittuartarpaa imminut paarilluarnikkut qanorsuaq angusaqartoqarsinnaasoq.
Immikkuullarissumik malunnaatilik: Kristian Heilmann, GSS assammik arsartartuni ukiorpassuarni siulittaasuusimasoq (najuuttut 37 procentiisa toqqarpaat)
