Atuarfik Inussuk aamma atuarfittut atorneqarallartut Atuarfik Samuel Kleinschmidt Ukaliusarlu pillugit Kommuneqarfik Sermersooq killiffimmik ilisimatitserusuppoq. Atuarfik Inussuup sapinngisamik piaarnerpaamik atorsinnaalernissaa siunnerfilimmik Kommuneqarfik Sermersuumiit qulakkeerniarneqarpoq, peqataanillu atuarfittut atorneqarallartut iluisa silaannaat suliffiillu avatangiisaat pillugit ajornartorsiutit aaqqiiviginiarlugit.
Atuarfik Inussuk maanna sumut killippa?
2024-mi decembarip ulluisa 16-ianni ataatsimiinnermi ersarissivoq, Atuarfik Inussuk pillugu ikuallattoqartillugu isumannaallisaanermut periusissiap akuersissutigineqarnissaa suli ajornartorsiutigineqartoq. Oqartussaaffeqarfinnit suliffiup avataani qatserisartutut siunnersortit sulisinneqarput, matumanilu ikuallattoqartillugu isumannaallisaanermut periusissiap Istakimut juulli sioqqullugu tunniutereerneqarsimassasoq naatsorsuutigineqarpoq. Atuarfiup 2025-mi atuutilersinneqarnissaanut tamanna alloriarneruvoq pingaarutilik.
Meeqqanut Atuarfeqarnermullu Ataatsimiititami siulittaasoq, Poul Petersen, ataatsimiinnermi erseqqissaavoq:
“Killiffik pimoorullugu suliaraarput aamma atuartut sulisullu isumannaatsumiitinnissaannut aaqqiissutissarsiorpugut. Peqataanik angajoqqaanik sulisunillu oqaloqatiginnittarnivut pitsaanerusinnaasut nassuerutigaarput, aamma maannamiit ammasumik attaveqaqatigiinnissaq pillugu immitsinnut pisussaatippugut.”
Atuarfittut atorneqarallartut iluini silaannaat
Atuarfik Samuel Kleinschmidtimi aamma Ukaliusami silaannaat ajornartorsiutaapput, taamaammat atuartunut sulisunullu pitsaanerpaamik atuartitsisoqarsinnaanngilaq. Taamaattumik silaannaat ukiup nutaamiit nalilersorneqarnissaat sukumiisumillu suliniutinik pilersaarusiortoqarnissaa Atuarfeqarnermut Ingerlatsivimmiit suliarineqarput. Suliniutit taakku ilaatigut tassaapput:
- Inini silaannalunnerpaajusuni silaannarmik saliissutinik/isugutatsitsisartunik ikkussuineq.
- Silaannarissarneq pitsaanerusoq aamma tamanut pitsaanerusumik avatangiiseqartitsinissamut pitsanngorsaaneq.
Tamatuma saniatigut ajornartorsiutit pinartut pitsanngorsaaviginiarlugit aamma atuartut sulisullu atugarissaarnerat isumannaatsumiinnissaallu pingaarnersiorneqarnissaat qulakkeerniarlugit immikkut aningaasaliisoqarpoq.
Attaveqaqatigiinneq aamma maannamiit suliniutigiligassat
Angajoqqaanut sulisunullu attaveqaqatigiinneq pitsaanerpaasimanngilaq, tamannalu decembarip ulluisa 16-ianni paasinarsivoq. Pitsaanerusumik paasissutissiisarnissaq qulakkeerniarlugu, atuarfimmi siulersuisut suleqatigalugit attaveqaqatigiinnissamut maanna pilersaarusiortoqarpoq. Maannamiit imaaliorumavugut;
- Atuarfik Inussuk aamma atuarfittut atorneqarallartut killiffissiorneri pillugit angajoqqaanik atuarfinnilu aqutsisunik ataavartumik oqaloqateqartarneq.
- Forældreintra, kommunip nittartagaa aamma internetsikkut inuit naapittarfii aqqutigalugit nutaarsiassiisarneq.
- Tusatsiakkat eqqunngitsumillu paasissutissiisarnerit akiorniarlugit eqqortumik ammasumillu attaveqaqatigiinneq.
Suleriaqqinnissaq
- Atuarfik Inussuk pillugu ikuallattoornermi isumannaallisaanermut periusissiaq Istakkimut juulli sioqqullugu tunniunneqassasoq naatsorsuutigineqarpoq, 2025-milu atuutilersitsinissaq anguniarneqarpoq.
- Atuarfik Samuel Kleinschmidtip aamma Ukaliusap silaannaasa nalilersorneqarnerat ukiup nutaap aallartinnerani aallartisarneqassaaq, sukumiisumillu pitsanngorsaanerit piaarnerpaamik aallartinneqassapput.
Ataatsimiinnermiit issuaaneq:
“Atuartut aamma ilinniartitsisut isumannaallisarneqarnerat atugarissaarnerallu eqqumaffigeqqissaarpavut. Meeqqat utaqqiisaasumik atuarfinniikkaluartulluunniit imaluunniit Atuarfik Inussummiippata, tassa atuarfiup atulersinneqarnera sioqqullugu, ulluinnarni pitsaasumik atugaqarlutillu toqqissisimanartumiinnissaat annertuumik pingaartitaraarput,” taama oqarpoq Søren Pedersen, direktør for Anlæg og Miljø i Kommuneqarfik Sermersuumi Sanarfinermut Avatangiisinullu pisortaq.