Ataasinngornermit ulloq decembarip 9.-nit Nuummi innuttaasut Kommuneqarfik Sermersuumit ikiorneqarsinnaanerat ajornaannerulissaaq. Kiffartuussinerit innuttaasunut tunngasut arlallit kommuneqarfiup allaffiani ataatsimoortilerlugit katersorneqarput – immikkoortortat pitsaanerusumik suleqatigiinnerat aqqutigalugu innuttaasut ulluinnaasa oqinnerulernissaat siunertaralugu kommunip suliniutaasa ilaattut.
Ingerlatsiviit akimorlugit suleqatigiinneq
Sullissinerup pitsanngorsarnissaanut atasumik immikkoortortat innuttaasunik toqqaannartumik attaveqanngitsut kommunip allaffianit allamut nuupput, taamaaliornikkut kiffartuussinerit innuttaasunut tunngasut arlallit inissaqartinneqalerlutik. Innuttaasunik Kiffartuussiviup saniatigut Meeqqanut Ilaqutariinnullu Ingerlatsivik aamma Isumaginninnermut Suliffeqarnermullu Ingerlatsivik kommuneqarfiup allaffianut nuupput. Tamanna isumaqarpoq, innuttaasut utoqqalinermi pensionit pillugit apeqqutissallit, suliffissaaleqinermi annertussusileriikkamik ikiorsiissutinik pisariaqartitsisut imaluunniit isumaginninnikkut sullissinermut tunngasut, soorlu innarluuteqarneq aamma meeqqanut ilaqutariinnullu suliassat pillugit saaffiginnikkumasut, siunissami kommuneqarfiup allaffianut saaffiginnittassasut.
Ataatsimoorluni iliuuseqarnerup sunniutai pillugit Kommunaldirektøri Ole Jakobsen erseqqissaavoq:
“Nuunneq taanna tassaavoq ingerlatsiviit assigiinngitsut aamma sulisut akornanni pitsaalluinnartumik suleqatigiinnerup inerititaa. Innuttaasoq pillugu ataatsimoorpugut nukissallu katersornerisigut sullissinerup pitsaassusia ataatsimoorluta qaffariartissavarput innuttaasunut sulisunullu tamanut nuannaarutaasumik.”
Nutsinngitsut aamma najukkat nutaat
Naak, atuuffiit amerlasuut maanna kommuneqarfiup allaffiani katersuukkaluartut, nutsinngitsut tassaapput:
- Majoriaq, suliffissarsiortut nalunaarsorneqartarfiat taanna maannamut inigisaminiiginnassaaq.
- Sanarfinermut Avatangiisinullu Ingerlatsivik, Nota Benep qulaani ininut nutaanut nuupput.
- Meeqqanut Atuarfeqarnermullu Ingerlatsivik Imaneq 20-mut nuupput.
Innuttaasut misigisaannut ataatsimoorluni kivitseqatigiinneq
Borgmesteri Avaaraq Olsen, nassuiaavoq:
“Kommuneqarfiup Allaffia innuttaasunut qaninnerusoq – innuttaasut ikiorneqarnissamik pisariaqartitsisut ajornannginnerusumik ikiorneqarsinnaanerannut uagut anguniakkatut takorluukkatsinnut – angusaavoq pingaaruteqartoq. Saniatigut immikkoortortat akornanni suleqatigiinnermut sinaakkutissanik nutaanik pilersitsivugut, taamaaliornikkut suli pitsaanerusunik angusaqarsinnaaneroqqulluta naapikkuminarneruleqqullutalu. Ataatsimut kivitseqatigiippugut – innuttaasut pillugit.”
Ataasinngorneq decembarip 9.-aat aallarnerfigalugu innuttaasut kommuneqarfiup allaffianut tikilluaqqusinnaalernissaat qilanaaraarput!