Kommuneqarfik Sermersooq Nuummi meeqqanut, inuusuttunut ilaqutariinnullu periuseq nutaaq atorlugu siunnersortinnissamut neqerooruteqarpoq. Neqeroorut 1. decembari 2024-mit atulissaaq.
Ammasumik kinaassutsimilli isertuussilluni siunnersorneqarnissamut innuttaasut siumut isumaqatigiissuteqaqqaanngikkaluarlutik ikiorserneqarsinnaapput, siunnersuinerlu ajornartorsiutinik soorlu pimmatiginnittarneq, ilaqutariinni akerleriissuteqarneq, aanngajaarniutinik ajornartorsiuteqarneq, tarnikkut atugarliorneq allarpassuillu oqaluuserinissaannut ammavoq.
Inunnut pisariaqartitsisunut, pisortat innersuussinissaat utaqqinngikkaluarlugu, siusissukkut tapersersuinissaq anguniagaavoq, tamannami ilungersunartunik ajornartorsiuteqalinnginnermi, soorlu sumiginnaanernik angerlarsimaffiullu avataanut inissiinernik, pitsaaliuutaaqataasinnaavoq. Ammasumik kinaassutsimilli isertuussilluni siunnersuineq akeqanngilaq kinaassutsimillu isertuussilluni saaffiginninnissamut neqeroorutaalluni, taamatullu ulluinnarni ajornartorsiutinik qaangiinissamut ikiorserneqarnissamut alloriarneq pingaaruteqarpoq.
Ammasarfiit:
Ornigulluni ammasumik siunnersortinneq kommunip ammasarfii malillugit ammasarpoq.
Ataasinngorneq – Pingasunngorneq: 10.00 – 15.00
Sisamanngorneq: 12.00 – 17.00
Tallimanngorneq: 10.00 – 12.00
Orniguttoqarsinnaavoq uunga Hans Egedesvej 7a, 3900 Nuuk (Kalaaliaqqap eqqaani Nipilersornermik Ilinniarfitoqaq).