Atuarfik Hans Lynge nutaamik pimmatiginnittarneq akiorniarlugu periusissiaqalerneratigut pimmatiginnittarnermik akiuiniarnermi pingaarutilimmik angusaqartoqarpoq. Kommunimi atuarfiit tamarmik namminneq pimmatiginnittarneq akiorniarlugu periusissiornissaat naatsorsuutigineqarpoq.
Ukiup affaanik suliaqareernerup kingorna Atuarfik Hans Lyngemi maanna pimmatiginnittarneq akiorniarlugu periusissiaq naammassineqarpoq.
”Atuarfimmi sulisut, atuartut, angajoqqaat, atuarfiup siulersuisui aqutsisuilu suliap ingerlaneranut tamarmik tunniussaqarput tamanit piginneqataanissaq akisussaaqataanissarlu qulakkeerniarlugu,” Atuarfik Hans Lyngemi pisortaq, Tom Ostermann-Søholm oqarpoq.
Periusissiaq ”Pimmatiginnittarneq pillugu isiginnittariaaseq nutaaq – Pimmatiginnittarneq akiorniarlugu Nuna tamakkerlugu periusissiaq”-mik tunngaveqartoq 28. aggustip kingorna atuarfiup siulersuisuisa ataatsimiinnerata kingorna piumasaqaatit malillugit akuersissutigineqarpoq.
Periusissiamik ineriartortitsineq Kommuneqarfik Sermersuumi peqqinnermut pitsaaliuinermullu siunnersortinit tapersersorneqarpoq, taakkua siornali septembarimi atuarfimmik suleqateqarput. Atuarfimmik kikkut tamarmik takuneqartutut, tusaaneqartutut naleqartinneqartutullu misigiffigisinnaasaannik pilersitsinissaq anguniagaavoq.
Kommuneqarfik Sermersuumit periusissiami “Peqqinnermik Siuarsaanermut Pitsaaliuinermullu Periusissiaq 2024 – 2030-mi pimmatiginnittarnermik pitsaaliuineq pingaarutilittut ilaatinneqarpoq, matumani atuarfiit tamarmik namminneq pimmatiginnittarnermik akiuiniarnermut periusissiornissaat naatsorsuutigineqarluni.
Paamiuni Atuarfik Tuiisamit periusissiaq aamma naammassineqangajalerpoq, Nuussuarmi Atuarfimmit suliaq oktobari 2024-mi aallartinneqarluni.
Taakkuninnga suliniuteqarnikkut Kommuneqarfik Sermersuumit kommune tamakkerlugu atuartunut toqqissisimanartumik peqataatitsisumillu ilikkarfiusussanik qulakkeerinninnissamut alloriartoqarpoq.